Lífið í Fana

Stýrivaxtalækkun í jólagjöf

2008-12-17T23:09:00.004+01:00

Á meðan stýrivextirnir liggja í 18% á Íslandi lækkaði Norges Bank stýrivextina sína úr 4,75% niður í 3,0%. Norðmenn eru afar kátir með þetta og ekki slæm jólagjöf fyrir flesta. T.a.m. hafa afborganirnar af húsnæðisláninu okkar lækkað um u.þ.b. 4000 NOK á mánuði síðustu vikur og við þetta ætti það að lækka um 2400 NOK til viðbótar. Er ég ákaflega glaður með þetta og ætla halda upp á þetta með einum "köldum" eða svo.

Fjárhagsstaða heimilisins hefur því batnað til muna. Verðbólgan hér er lág og finnst mér verðlag hreinlega hafa staðið í stað síðustu 3 ár, a.m.k. verð ég ekki var við að vara og þjónusta sé að hækka. Hjá okkur er því uppgangur en ekki kreppa. Hver veit hvort maður láti ekki bara verða að því að fjárfesta í ÞESSU eins og lengi hefur staðið til. Ykkur að segja kostar þessi skjár ekki nema rúmlega 20.000 NOK hér í Noregi, 899.ooo ÍSK, hvað rugl er þetta eiginlega???

Silla er nú sem stendur á djamminu, já á miðvikudagskvöldi. Svo aftur á föstudagskvöldið. Já þetta er ungt og leikur sér. Ég sit nú bara einn og sauma á meðan ég þess á milli glamra á gítarinn minn.

Annars vona ég að jólakortin komi til með að skila sér. Fékk verstu þjónustu sem ég hef fengið lengi þegar ég:

1. Þegar jólakortafyrirtækið svaraði ekki í símann í 2 daga.

2. Þegar þeir svöruðu ekki tölvupósti í 4 daga.

3. Þegar þeir sendu mér ekki skilaboð um að kortin væru komin úr prentun.

4. Þegar ég fékk kortin viku seinna en mér var lofað.

5. Þegar ég fékk vitlaust "design" á öll 40 kortin.

6. Þegar myndgæðin voru langt frá væntingum.

Velti því alvarlega fyrir mér hvort þetta hefði með nafnið mitt að gera að gula litarháttinn. Átti samt sem áður von á að fá extra góða þjónustu þar sem fyrirtækið heitir "JapanPhoto"!

Einhvern veginn kom orðið "TESTVINNER" ekki alveg strax upp í kollinn minn.

Annars lítur ekki út fyrir hvít jól, spáin hljóðar upp á 7 gráður og rigningu takk fyrir.

Bið að heilsa í bili og óska öllum heilagra jóla. Hver veit nema boðskapur jólanna fái stærri sess en áður.

Bloggtilraun

2008-11-29T21:42:00.002+01:00

Jú það er ekki um að villast. Ég ætla að gera síðustu tilraun til þess að halda síðunni semi-uppdeitaðri, lofa þó engu.

Það er allt rosalega gott að frétta af okkur, engin kreppa hér og allir við hrossaheilsu. Síðustu 3 mánuðir hafa verið gríðarlega strembnir í vinnuni hjá mér, verið undirmönnuð og vantar fólk til vinnu. Hef unnið tvöfalt nú í 2 mánuði og fer að fá nóg. Vaktirnar hafa verið 32 tíma vaktir sem einungis Íslendingar ná að tækla. Sem betur fer er ég í fríi um jólin, a.m.k. rauðustu dagana.

Allt gott er að frétta af krökkunum, Ómari Snæ og Ásdísi Evu gengur vel í skólanum og líkar vel. Ómar er orðinn algjör lestrarhestur og hefur líklega hesthúsað 10 alvöru bókum síðusta mánuð. Hann er sömuleiðis farinn að auka við sig æfingarnar og er farinn að æfa 3svar í viku. Ekki líður á löngu þar til pilturinn fer undir 40 sekúndurnar í 50 m skriðsundi, vonandi verður það áður en hann verður 9 ára.

Talandi um sund, um helgina fer fram Norska Meistaramótið í sundi hér í Bergen og hefur Sindri Þór sigrað 3 greinar. Helstu afrek hans eru sigur í 200 m fjórsundi (2:04,12), 200 m flugsundi (2:01,95) og 1500 m skriðusundi (15:57,19). Hann varð síðan í öðru sæti í 100 m flugsundi á 55,77 sek. Á morgun syndir hann síðan 400 m fjórsund og á hann sigurinn nokkuð vísan.

Hef ákveðið að nefna aldrei K-orðið hér en ég verð þó að viðurkenna að ég er ansi feiginn að búa í Noregi þessa tímana og vera í vinnu þar sem ALLTAF vantar fleira fólk.

Við biðjum öll að heilsa og vonum að sem flestir láti heyra í sér. Sæl að sinni.

p.s. Silla og Sindri koma til Íslands 07.-17. janúar með sundfélaginu til æfinga og keppni. Sjáumst kannski þá.

Hita og veðurmet hægri vinstri

2008-06-03T23:30:00.004+02:00

Ég er orðinn stressaður. Ég er hræddur um að við í Bergen klárum sólar og hitakvótann áður en sumarið er allt. Það er nefnilega búið að vera þetta 18-28 gráður frá því í lok apríl, samtals í 5 vikur. Síðusta vika hefur slegið öll veðurmet og heitasti maí-dagur í 100 ár leit dagsins ljós, 31,1 gráða rétt fyrir norðan Bergen. Í dag voru 27 gráður og það sér ekki fyrir endann á góða veðrinu. Amma Stella og Afi Beggi hafa heldur en ekki tekið veðrið með sér. Sjórinn t.o.m. er orðinn heitur, nálægt 21 gráðunni.

Það er sko ekki að sjá að Afi Beggi hafi orðið sjötugur í maí. Kallinn er búinn að þræða hvert fjallið á fætur öðru og þann 25. maí fórum við svokallaðan 4-fjellstúrinn þar sem við gengum á 4 af 7 fjöllum Bergens. Kallinn fór létt með þetta og haft er eftir gárungum að öll 7 verði tekin næst, a.m.k. áður en hann fer í kistuna. Hann lætur þetta ekki duga heldur hefur hann vaknað með hinum vitleysingunum á heimilinu kl. 5:20 til þess að klifra upp Stoltzenkleiven niður í bæ. Síðan gengur hann fram yfir degi yfir fjöll og fyrnindi og kallinn er síðan sóttur þegar ég er búinn í vinnu.

Amma Stella fór til Íslands fyrir rúmlega viku eftir að hafa verið hjá okkur í 3 vikur, gamli fer síðan heim 7. júní eftir að hafa sleikt sólina í 4 vikur. Og viti menn, hann er orðinn svartur, algjör "svertingur" eins og Ásdís Eva orðar það.

Var annars að setja smábrot af myndum inn á myndasíðuna. Mest símamyndir í maí. Röðun myndana er því miður ekki í tímaröð en ég vona að fólk missi ekki legvatnið yfir því. Bið svo að heilsa í bili frá Bergen á Spáni.

p.s. hverjir ætla að koma með mér og Begga á Ísland-Makedónía sunnudaginn 15. júní?

Bara Sumar!

2008-05-10T21:33:00.005+02:00

Vonandi klárum við ekki ársins sólar og góðviðriskvótann í Maí. Hér hefur ekki sést skýhnoðri á himni í viku og í gær fór hitinn upp í 26 gráður. Í dag var hann örlítið kaldari, 24 gráður. Amma Stella tók greinilega með sér góða veðrið eins og í fyrra. "Svertingurinn" var að sjálfsögðu ánægður með veðrið enda bekkurinn góði frátekinn fyrir kallinn. Við borðum úti klukkan níu í gærkvöldi og líklega verður ekkert lát á útiáti.

Annars gengur allt vel, enda ekki annað hægt í svona veðri. Sindri er að gera góða hluti á Bergen Swim Festival þar sem Oleg Lisogor er m.a. meðal keppenda. Fór loksins undir mínútuna í 100m baksundi og 100m fjórsundi.

Kajakarnir voru teknir fram í dag og túr í Lysefjörðinn er áætlaður á mánudaginn. Vonum að kallinn sé í formi. Ég dustaði rykið af myndavélinni minni þannig að ég lofa myndum næst. Annars á ég eitthvað af símamyndum sem ég gæti svo sem látið flakka. Hér er a.m.k. ein af Ásdísi að spóka sig í sólinni.

Kveðjur úr sól og hita.

Sumarið að koma?

2008-04-05T18:40:00.003+02:00

Af okkur er allt það besta að frétta. Sindri Þór er á Íslandi þessa helgina og tekur þátt í ÍM50. Nú þegar hefur hann unnið til tveggja gullverðlauna, í 400m fjórsundi og boðsundi. Í dag er það síðan 100m flugsund og á morgun 200m flugsund. Allir vita að þar er Sindri hvað sterkastur og Íslandsmetið er í verulegri hætti vægt til orða tekið.
Ég sjálfur ætla síðan að koma til Íslands/Akureyrar 11. apríl og smíða smávegis á FSA í 10 daga eða svo. Amma Dísa og Mæja frænka koma á sama tíma til Noregs til þess að fylla skarð húsbóndans.
Við höldum í vonina að sumarið sé að koma, þó að hitastigið hækki hægt. Sólin lætur sjá sig æ oftar og kajakarnir verða brátt teknir út. Báðir bílarnir eru a.m.k. komnir á sumardekk. Vel á minnst, í gær fékk Silla nýja bíl í sumargjöf frá mér. Glæsilegan Ford S-Max sem hefur heldur betur slegið í gegn í Evrópu. Frábær stór 7 sæta fjölskyldubíll með aksturseiginleika sportlegs fólksbíls. Við erum ótrúlega ánægð með hann þrátt fyrir stuttan reynslutíma, líka gaman að prófa nýja tegund.

Bið að heilsa í bili, hér er svo mynd af nýjasta fjölskyldumeðlimnum.

Sumarið planlagt

2008-03-11T20:35:00.006+01:00

Nú höfum við planlagt sumarið svo langt sem það nær. Um miðjan júní komum við til Íslands.

Sindri Þór mun taka þátt í Aldursflokkameistaramótinu sem fram fer 19.-22. júní en síðan heldur hann beinustu leið aftur út til Ungverjalands þar sem hann mun æfa fram að Norska Meistramótinu (10.-13. júlí). Þá kemur hann aftur til Íslands til að æfa fram að Evrópumeistramóti Unglinga sem er um mánaðarmótin júlí-ágúst. Hann mun síðan dvelja í Reykjavík þangað til skólinn byrjar um miðjan Ágúst.

Undirritaður mun hefja sumarfríið á því að láta Norðlendinga kenna til skurðarhnífsins. Ég mun vinna í 4 vikur, gaman-gaman-hlakka bara til (spauglaust).

Sigurlín og börn fá síðan að leika lausum hala þessar 4 vikur, baða sig í sólinni, sleikja rjómaís og slappa af.

Þann 11. júlí höldum við síðan heim til Noregs. Þá tekur við hið eiginlega sumarfrí því að frændi minn er að koma (frændi minn sko....).

Arnar, Ingunn María, Albert, Arnhildur og Elvar Þór ætla að dvelja hjá okkur í 2 vikur. Það verður örugglega bara hið besta mál. Arnar hyggst æfa að kappi fyrir Reykjavíkurmaraþonið og hefur ráðið mig sem einkaþjálfara. Taumlausar æfingar, sviti og tár er það eina sem er á boðstólnum og "sá kaldi" verður að bíða betri tíma í ísskápnum. Fyrir aðra fjölskyldumeðlimi (því Arnar verður að einbeita sér að maraþoninu) verða náðugir tímar á pallinum, útiborðhald, grillmatur, kajakróður, skógarferðir, fjallatúrar og hugsanlega "einn kaldur" ofarlega á dagskránni.

Fimmtudaginn 31. júlí er ferðinni síðan haldið til Parísar. Þar munum við reyna að mála borgina rauða og eflaust verður Disneyland sett ofarlega á óskalistann hjá yngri meðlimum fjölskyldunnar. Annars er eflaust gríðarlega mikið að skoða og hefur Sigurlín verið ráðinn sem "gæd" en hún þekkir borgina eins og lófann á sér.

Mánudaginn 4. ágúst fjúgum við síðan til Billund þar sem við ætlum að dvelja í 3 nætur. Það kæmi mér ekki á óvart ef Legoland yrði heimsótt, oftar ein einu sinni.

Þann 7. ágúst erum við aftur heima og þá verður restin af sumarfríinu notuð til þess að sleikja sól.

Sjáumst í sumar!

Í dag er í kvöld

2008-02-29T16:45:00.004+01:00

Oftar en sjaldnar hef ég leyft mér að bölva Norðmönnum vegna óstundvísi og seinagangs. Oftar en ekki hafa hinir ýmsustu herramenn ætlað að slá á þráðinn "i dag" og oftar en ekki á ég að fá vörur sendar "før neste fredag". Hversu pirrandi er það síðan þegar að hlutirnir gerast nokkrum dögum seinna en lofað var? Hversu leiðinlegt er að bíða eftir símtali í margar klukkustundir? Þetta hefur sem sagt verið kvöl og pína fyrir að ég held skipulagðan og staðfastan mann eins og mig.
Hins vegar er bót á máli. Í Noregi þýðir nefnilega "í dag" alveg fram til miðnættis, m.ö.o. að ef einhver segist ætla að hringja í þig "í dag" gæti hann hringt kl. 23:18 með góðri samvisku. Þetta skýrir afar margt og hefði ég vitað þetta væri tungan í mér ekki eins svört og hún er í dag.
Og ef þú t.d. kaupir vöru á mánudegi og þér er sagt að þú fáir hana "fyrir næsta föstudag" þá þýðir það að viðkomandi hafi 10 daga til þess að koma vörunni til þín. "Næsti" föstudagur í Noregi er sem sagt viku seinna en í Íslandi. Ef ég hefði áttað mig á þessu hefðu tugir kvörtunarsímtala verið ónauðsynleg og misfalleg orð hefðu geta haldið sig á mottunni.
Nú eru því gríðarlegar vonir bundnar við minni pirring og betri stundir.
Sæl að sinni.

Loksins!

2008-02-18T12:48:00.002+01:00

Tveggja mánaða bloggfríi er lokið og hef ég lofað sjálfum mér að reyna að vera duglegur að slíta lyklaborðinu næstu misseri. Ósköp venjuleg leti og framtaksleysi hefur orðið til þess að undirritaður hefur ekki slegið inn staf á þessari síðu síðustu vikur. Gangskör verður gerð.

Allt gott er að frétta af Fanagenginu. Þessa dagana slít ég gólfdúkum Fjórðungssjúkrahússins á Akureyri þar sem ég mun reyna að endurbyggja leggi leggjalangra Norðlendinga. Ráðningarsamningurinn rennur út á sunnudaginn og þá mun leiðin liggja aftur heim til Fana.
Ég hef ekkert breyst, ekkert stækkað en þó grenst töluvert. Ég ligg ennþá 18 staðalfrávikum ofar meðaltalinu hvað varðar vinnu og lítið sem bendir til þess að ég nái norska meðaltalinu á næstu mánuðum.

Ásdís Eva og Ómar Snær hafa það náðugt hjá Ömmu Dísu í Kambagerðinu og þarf þolinmæði mín og þjónustulund að þrefaldast til þess að börnin fái ekki fráhvarfasýki þegar heim verður komið. Bjúgu, saltkjöt og baunir, kjötsúpa og steiktur fiskur eftir pöntun er eitthvað sem ég og mín heittelskaða náum ekki alveg að uppfylla.
"Það er svo langt síðan ég hef fengið svona góðan mat" sagði Ómar Snær um helgina eftir að hafa troðið sig fullan af hangikjöti og jafning.

Sigurlín Þóra og Sindri eru stödd fyrir sunnan þar sem Sindri æfir af kappi fyrir stórátök næstu vikna. Á döfunni er m.a. alþjóðlegt stórmót í Berlín með norska unglingalandsliðinu, Íslandsmeistaramótið í 50 m laug, norska meistaramótið og alþjóðlegt mót í Luxemborg með íslenska unglingalandsliðinu. Pilturinn heldur upp gömlum vana og heldur til annað hvort í lauginni eða í útlöndum. Hann setti m.a. Íslandsmet í piltaflokki um helgina í 200 m flugsundi á Gullmóti KR. Glæsilegt það.
Silla er með sundliðið sitt, Delfana, í æfingabúðum (einnig búin að keppa á Gullmóti KR) í Keflavík. Þau komu síðasta miðvikudag og halda heim á föstudaginn. Öllum gengur vel og allir hrifnir af land og þjóð.

Annars hefur viðrað vel á okkur í Noregi síðustu vikur. Allt að 10 stiga hiti og sól. Núna fer maður að gera kajakan klára og þá getur maður sagt að sumarið sé komið. Annars er sumarið óráðið. Eins og fyrr er opið hús fyrir gesti og gangandi hvenær sem er. Bið ykkur annars vel að lifa og ef einhver vill láta vita af sér meðan við erum hér á Fróni er hægt að ná í okkur í síma 6624747 (Silla) eða 8600456 (Ómar).

Til hamingju með jólin!

2007-12-16T22:26:00.000+01:00

Ég hef ákveðið að gerast raunsær. Þetta er síðasti pistill ársins og stuttur verður hann. Var að setja örfáar myndir inn, m.a. úr ferð okkar í jólatívolí þar sem við áttum m.a. fundi með Baldri og fjölskyldu sem og dönskum jólasveinum.

Annars hafa síðustu vikur liðið með ógnarhraða. Ég vann víst eins og brjálaðingur í nóvember, Sindri synti hratt að venju, Ómar, Silla og Ásdís urðu lasin og það varð kalt.

Núna er jólaundirbúningurinn í fullum gangi, húsið hálfþrifið og skreytt, jólakortin og jólapakkarnir komnir á sleðann og jólatónlistin komin í hús. Einungis vika til jóla svei mér þá.

Jæja, ég segi bara gleðileg jól til ykkar allra, megið þið eiga gleðiríkar stundir í faðmi vina og ættingja og skuli nýja árið færa ykkur frið, hamingju og lukku hafa flestar okkar óskir rætst.

Sindri bætti bronsi og silfri í safnið í dag

2007-11-25T21:34:00.001+01:00

Sindri synti 400 fjór á 4:37,08 mín sem er 5 sek bæting. Hann varð í 3. sæti. Í 4x100m fjórsundi sýndi hann að 56,85 sek í 100 flugi á föstudaginn var engin tilviljun því í dag fór hann á 56,39 sek. Strákarnir urðu í 2. sæti.

Samtals 14 sund, þar af bæting í 13. Það getur nú ekki talist slæmt. Jæja, þá er best að fara að sækja piltinn á flugvöllinn. Bið að heilsa í bili og hvernig væri að klappa fyrir drengum.

Nýtt Piltamet hjá Sindra

2007-11-24T19:05:00.000+01:00

Sindri var rétt í þessu að setja Piltamet í 200 m flugsundi á Norska Unglingameistaramótinu. Hann synti 200 m flugsund á 2:05,72 mín en gamla metið átti Birkir Már úr ÍRB 2:07,13 mín. Hann gerði sér lítið fyrir og sigraði sundið þrátt fyrir að eiga 3 ár eftir í unglingaflokki.
Annars byrjaði Sindri mótið með því að koma kvefaður til leiks og átti í erfiðleikum með hósta og öndun í fyrsta sundinu, var töluvert frá sínu besta í 200 m fjórsundi en síðan var kverkaskíturinn yfirbugaður, nítróið sett í gang og hvert glæsisundið á fætur öðru leit dagsins ljós.

200 fjór . . . . . . . . . . . . . . . 2:13,51. . . . . 8. sæti, 4 sek frá sínu besta og komst ekki í úrslit.
50 flug . . . . . . . . . . . . . . . . . .26,22 . . . . .7. sæti, bæting um 23 hundraðshluta.
50 flug í boðsundi. . . . . . . . .25,37. . . . .2. sæti, nánast sekúnda í bætingu, fljúgandi start.
100 skrið í boðsundi . . . . . . 53,60 . . . .2. sæti, bæting um 2 sek.
100 flug . . . . . . . . . . . . . . . . .56,85 . . . . 2. sæti, bæting um 1 sek. Piltametið er 56,70.
200 skrið i boðsundi . . . . 1:58,64 . . . . 3. sæti, sami tími og hann á.
50 skrið í boðsundi . . . . . . . 24,15 . . . . 4. sæti, sekúndu bæting, fljúgandi start.
200 flug . . . . . . . . . . . . . . .2,05,72 . . . . 1. sæti, bæting um 4 sekúndur. PILTAMET.

Á morgun syndir hann síðan 50 skrið, 100 flug í boðsundi og 400 fjór. Hvet alla til að fylgjast með Sindra Þór beint HÉR.

Annars er mannskapurinn lasinn þessa dagana. Ómar Snær er búinn að vera lasinn í viku og Ásdís Eva í 4 daga. Gamla settið er stáli slegið sem fyrr.
Róleg tíð framundan í vinnunni, þ.e.a.s. ein vakt næstu 4 vikurnar, einsdæmi og gaman verður að sjá hvort ég tækla það. Annars er ég kominn með 500 aukavaktatíma/yfirvinnutíma það sem af er árinu og það finnst Norðmönnum "sykt".
Sjáumst síðar og áfram Sindri!!!!

Sindri Syndir Sinnsykt

2007-11-11T16:54:00.000+01:00

Sindri var rétt í þessu að ljúka keppni á Nordsjømótinu í Stavanger. Það væri mjög vægt til orða tekið ef ég héldi því fram að hann hafi staðið sig vel drengurinn. Hann stóð sig eiginlega "sinnsykt" vel eins og við segjum hér í Noregi. Það þarf náttúrulega ekki að taka það fram að um stórbætingar var að ræða í öllum sundunum. Þrjú gull og eitt silfur (árg. 91-92). Svo komst hann í SUPERFINAL í 100 flugi og 200 fjór.

50 bak ............ 28,05 sek .......... 2. sæti.
50 flug ............ 26,45 sek .......... 1. sæti.
100 flug .......... 57,88 sek .......... 1. sæti - 4. sæti í senior.
200 fjór ...... 2:09,73 mín .......... 1. sæti - 4. sæti í senior.
200 skrið .... 1:58,27 mín .......... 4. sæti.

Samkvæmt mínum bókum hefur strákurinn bætt tíma húsbónda heimilisins í 100 flugi um 1/100 sek sem er gott fyrir hann en verra fyrir mig því nú fell ég um eitt sæti á heimslistanum. NM Junior er svo aðra helgi og þá mun hann verða hvíldur og búast gárungar við stórkostlegum árangri. Einhver nefndi jafnvel heimsmet.

Annars er snjór hér í Bergen, vetrardekkin komin undir og kuldaskórnir farnir að slíta götum bæjarins. Flest er við sama heygarðshornið, brjálað að gera í vinnunni og erfið törn framundan með fullt af vöktum, fyrirlestrum og ráðagerðum.
Launin verða fjölskylduferð í Jólatívolíið í Köben 11.-13. desember. Okkur hlakkar óendanlega til.
Skíðin verða svo bráðlega tekin út og árleg skíðaferð til Geilo skal planlögð hvað og hvenær. Þeir sem hafa áhuga að koma með í vikuferð til Geilo á skíði láti í sér heyra.
Guð gefi ykkur góðan dag!

10 km: 39:31 mín!

2007-10-17T22:58:00.000+02:00

Já ég gat ekki setið á mér að reyna. Fór út í dag og reyndi mig við 10 km aleinn í roki og rigningu og viti menn, náði þessum svaka tíma, 39 mín og 31 sek. Splittin voru 19:50 og 19:41, nánast fullkomin splitt því einhver sagði að alvöru hlauparar splittuðu 51/49%. Púlsinn hékk nánast í 180-185 eftir fyrstu 2 km. Þetta veit á tíma undir 38 mín í keppni þar sem maður getur hlaupið í grúppu. Nú mega menn eins og Baldur Már, Arnar og Maggi Túrbó fara að passa sig.

Annars fékk ég hugrenningu eða hugskot og skellti nokkrum slettum á bómull í vikunni. Afraksturinn er hér. Fyrri myndin heitir "Óákveðinn óljós samruni" og er akrýll á bómull og sú seinni heitir "Leiðin að gullinu", gullakrýll og strigi.

Nánari upplýsingar HÉR.

Kallinn að komast í form

2007-10-14T22:43:00.000+02:00

Fyrsta hálfmaraþonið (21 km) var þreytt í síðustu viku. 1:37,21 og var það frekar létt, splittað öfugt þ.e.a.s. 49,33 mín og 47,48 mín. Miðað við þetta er 1:29,59 mjög raunhæft næstu mánuði. Svo hljóp ég m.a. upp á Fanafjallstoppinn í dag, 21,30 mín og var það dr.....erfitt. Verð ánægður þegar ég er kominn undir 19 mín sléttum.
Annars hef ég komið sjálfum mér á óvart, kominn mjög vel af stað í ræktinni á morgnanna og út að hlaupa eða spinning seinni partinn ef tími leyfir. Ég hef verið að ná þetta 6-9 æfingum í viku og nú mega sumir á heimilinu fara að passa sig. En annars mjög gaman að þessu, tala nú ekki um þegar maður sér mörina, skvapið og lýsið leka af mallakútnum.

Annars hefst hefðbundið líf aftur eftir 9 daga frí hjá mér. Ég náði a.m.k. að æfa vel og svo lagði ég gólf uppi á háalofti þannig að geymslurýmið jókst um 50 fm.
Dagurinn í dag mun síðan verða skráður í dagbókina sem einn af afkastamestu dögum ársins. Á 5 klst náði ég að fara út að hlaupa (1 klst), Fara í sund út í Os með Ásdísi Evu (2 klst) og þegar heim var komið tæklaði ég 3 þvottavélar, 3 þurrkara og samanbrot á öllu og til að kóróna allt grillaði ég hvítlauksskotið lambalæri. Silla kom síðan heim úr vinnunni akkúrat þegar sósan var lögð á borðið. Þar fékk ég eitt risakreditt hjá kellu.

Góðar stundir og æfið vel.

Silla byrjuð að vinna í mötuneyti

2007-09-29T22:15:00.000+02:00

Ég verð aldrei bestur í blogga, svo mikið er víst. Annars gengur allt sinn hefðbundna gang. Veðrið er ekkert að hrella okkur, fór upp í 18 gráður í fyrradag og það á víst að haldast um 12-15 gráðurnar eitthvað lengur. Hins vegar fer hann nálægt núllinu á næturna.

Ég...
...er orðinn rosalega duglegur að æfa, æfi kl. 6 á morgnana og svo út að hlaupa seinni partinn ef tími gefst til. Síðustu viku náði ég 8 æfingum og það stefnir það sama þessa vikuna. Í morgun náði ég að hlaupa 11 km á 48 mín og var að halda 4:25 mín að meðaltali kílómeterinn. 10 km var ég á 44:22 mín þannig að ég fer að nálgast mitt besta form. Stefnan er tekinn á 39:59 mín.
Svo keypti ég mér kerru.

Silla...
...er byrjuð í nýrri vinnu. Hún er farin að vinna í mötuneyti, smyr ofan í íþróttagarpa heimilisins. Vinnutíminn er 22:00-23:00 sun-fim og það er ekkert smá sem þessir tveir láta ofan í sig. Bara Sindri hesthúsar að meðaltali 2 stórum baguette brauðum og 6 rúnstykkjum með skinku, pepperoni, káli og gúrkum, bara fyrir hádegi og svo sveltur hann þangað til hann kemur heim. Sá gamli liggur 2 rúnstykkjum aftar á merinni. Greyið Silla verður því að hafa sig alla við á kvöldin ef karlpeningurinn á að halda morgundaginn út.

Sindri Þór...
...fór til Danmerkur í dag. Þar ætlar að hann að vera rosalega duglegur að æfa og svo ætlar hann að sýna Dönum hvar Davíð keypti ölið. Hann kemur svo tilbaka 8. október.
Honum gengur vel í skólanum og er mjög ánægður. Svo er hann farinn að tala spænsku hægri vinstri.

Ómar Snær...
...er að verða hrikalega góður í sundi og ætlar greinilega að feta í fótspor sumra. Eins og er er það skriðsund og baksund sem eru aðalgreinarnar hans og ef mig minnir rétt að þá var það faðir hans sem setti Íslandsmet í 50 m skriðsundi (39,5 sek) og 50 m baksundi (50,0) hnokka þegar hann var 9 ára á KR/Speedo í janúar 1986.
Skólinn ætlar ekki heldur að vefjast fyrir honum, a.m.k. fer hann létt með aukaverkefnin sem kennarinn lætur hann hafa. Ég hef síðan byrjað að kenna honum diffrun og líkindareikning.

Ásdís Eva...
...er enginn aumingi sko. Viti menn, hún er byrjuð að lesa og lærði það eiginlega á einu kvöldi. Núna les hún fyrir mig á kvöldin, svo breiðir hún yfir mig þegar ég er sofnaður. Stærðfræðin verður greinilega hennar aðalfag þar sem hún er orðin fantaflínk að reikna, plús, mínus og margföldun.

Svo lofa ég að reyna að vera duglegri að taka myndir og setja inn. Bið ykkur annars vel að lifa og vona að þið spjarið ykkur.

Kvef - hvað er til ráða?

2007-09-09T01:50:00.000+02:00

Kverkaskítur, aumingjaskapur, ræfilsháttur, skítnös og hornös eru sjaldgæfari orð yfir kvef. Allir hafa fengið þennan sjúkdóm/heilkenni og allir eiga eftir að fá kvef oftar en einu sinni og oftar en fjórum sinnum.

En hvað er til ráða?

Margir eiga e.t.v. gott ráð í pokahorninu, annað hvort frá ömmu, mömmu eða einhverjum læknisfræðingi út í bæ. Hitt er þó nokkuð klárt að EKKERT LÆKNAR KVEF. Hið hefðbundna kvef valda oftast veirur sem búa í nefinu/efri öndunarveginum á okkur. Við náum að halda þeim í skefjum, bæði með bifhárum og slími sem og hinu alþekkta ónæmiskerfi. Það gefur því nokkuð augljósa leið að hvað það sem getur bælt annað hvort ónæmiskerfið eða þennan bifháramekanisma getur orðið til þess að maður kvefist. T.d. streita, lítill svefn og næringaskortur getur haft áhrif á ónæmiskerfið svo ekki sé minnst á fjöldan allan af kvillum sem ég ætla ekki að fara nánar út í. Hvað bifhárin og slímið varðar þá hefur t.d. kuldi þau áhrif að bifhárin verða aðeins latari en ella.
Ef maður ætlar að breyta því sem verða vill á einhvern hátt verður maður að bregðast skjótt við, helst við fyrsta hor eða hnerr. Þá hafa rannsóknir sýnt að mjög háir skammtar (1-3 gr 3-4x á dag) af C-Vítamíni geta stytt kveftímann úr 5-8 dögum í 3-6 daga. Þetta virkar víst betur hjá ungu hrautu fólki, t.d. íþróttafólki. Sólhattur mun einnig geta haft einhver áhrif en þó líklega meira í fyrirbyggjandi skyni. C-Vítamínið breytir víst pH gildi slímsins þannig að lífskilyrði veiranna harðnar, þetta er a.m.k. ein kenningin.
Til þess að fá bifhárin á fulla ferð virkar sú ævaforna aðferð að anda að sér heitri gufu, þá verða hárin virkari. Svo þarf maður að muna að drekka ríkulega af vökva til að halda slíminu nægilega þunnfljótandi.

Á maður að taka því rólega eða hvað?

Tja, kvef læknast að sjálfu sér eftir 3-10 daga. Hugsanlega er hægt að hafa smávægileg áhrif á lengd veikindanna með C-Vítamíni, Sólhatti, heitri gufu, vökvatöku, nægum svefni og hvíld. Það fer því eftir eðli daglegs aktífitets hvort ráðlegt sé að breyta einhverju eða ekki.

Að lokum er rétt að geta þess að það eru í raun afleiðingar kvefsins sem við erum f.o.f. að forðast, t.d. berkjubólga, lungnabólga, kinnholubólga og eyrnabólga svo dæmi séu nefnd.
Vona að þetta hafi hjálpað einhverjum. Snýtið ykkur!

Haustlíf

2007-09-04T17:19:00.000+02:00

Í gær fóru síðustu gestirnir. Elín María og Inga Þóra flugu heim til Íslands. Frá 6. ágúst hefur verið stöðugur gestagangur og það hefur verið frábært að geta tekið á móti öllu þessu fólki. Nú tekur hefðbundið 5 manna heimilislíf við, gaman, gaman.
Annars er haustið afar snemma á ferðinni. Ég þurfti að skafa rúðurnar í morgun mér til mikillar furðu. Annars höldum við ennþá í vonina þar sem september og október voru býsna góðir í fyrra og 10. október í fyrra fór hitinn upp í 19 gráður.

Ég gerðist svo djarfur að kaupa mér árskort í ræktina. Jújú, það gekk ekkert rosalega vel síðast en þá fór ég ekki nema ca. 10 sinnum það árið, ansi dýr sú líkamsrækt. En planið núna er sem sagt að keyra Sindra á sundæfingu á hverjum morgni klukkan 5:30 og síðan æfa áður en ég held til vinnu. Þá verðum við báðir að vakna því ef Sindri mætir ekki verður hann rekinn úr félaginu og ef ég æfi ekki verð ég feitur. Gott plan ekki satt?

Annars fékk ég gleðifréttir í dag. Ég fékk sem sagt fasta stöðu á spítalanum. Mikill heiður fyrir mig og þetta þýðir líka að Nossararnir losna ekki við mig fyrr en eftir fjögur ár í fyrsta lagi. Þar skutu þeir sig nú í fótinn! Þessu verður fagnað með útiáti.

"Pabbi, þetta er lífið!"

2007-08-20T22:55:00.000+02:00

Jæja, nú hef ég loksins komið því í verk að setja myndir inn á síðuna. Tvö ný albúm hafa litið dagsins ljós, annað frá því á Íslandi í sumar og hitt eftir að við komum heim. Síðustu 2 vikur hafa verið viðburðaríkar, Doddi, Arna Rún og Afi Beggi komu þann 6. ágúst og kvöddu þau tvö fyrst nefndu í dag. Afi Beggi ætlar að sóla sig í viku í viðbót. Svo kom Elín María í dag og ætlar að vera hjá okkur í rúma viku.

Það sem er helst að frétta er að ég var að kaupa mér dót. Svo virðist sem að sjóndeildarhringurinn sé eitthvað að stækka því hér geta allir fjölskyldumeðlimir leikið. Ég keypti sem sagt 3 stk kajaka. Frábært alveg og við erum búin að padla alla daga síðan við fengum þá. Maður skellir þeim bara á öxlina og töltir niður að vatni. Síðan kemst maður eftir nokkrum krókaleiðum yfir í næsta vatn sem er risastórt. Það besta er að þeir eru uppblásanlegir og geymast í tösku þannig að maður tekur þá bara með í útileguna, ógeðslega sniðugt. Doddi átti reyndar í einhverjum vandræðum og hefur ekki alveg náð tökum á kajökunum en það kannski kemur síðar, kannski um það leiti sem hann þorir í Stoltzen !!! ;)

Annars var ég að klára vaktatörnina ógurlegu, ekkert mál fyrir Jón Pál. Strákarnir eru byrjaðir í skólanum og Silla byrjar að vinna á morgun. Framundan er síðan hefðbundið daglegt brauð en það er alveg klárt að það verður padlað fram í nóvember/desember. Elín og Silla voru að koma í land rétt í þessu, spegilslétt vatnið og 17 stiga hiti núna kl. 22:00. Þetta getur bara ekki orðið betra. Eins og Ómar jr. sagði þegar við sigldum eftir spegilsléttu vatninu kl. 23 eitt kvöldið, "Pabbi, þetta er lífið!". Það eru sko orð að sönnu.

Við viljum Albert með okkur á froskaveiðar!

2007-08-08T22:59:00.000+02:00

Jæja nú fer að styttast í að ég komi myndum sumarsins inn á myndasíðunna. Það verður þó eigi í kveld. Annars er allt það besta að frétta af okkur hér í Fana. Afi Beggi, Doddi móðurbróðir og Arna Rún komu á mánudaginn þannig að hér er hrikalega góðmennt. Grillmatur, froskaveiðar, einn kaldur, hjólatúrar og göngutúrar eru fyrirferðarmiklir þættir í dagsins aktífiteti. ´

Ásdís Eva dafnar vel á nýja leikskólanum og er strax búin að eignast "bestu" vinkonuna, Helgu. Ómar Snær bíður spenntur eftir stóra bróður eins og við reyndar öll hin, það verður frábært að fá snáðann tilbaka.
Ég er rúmlega hálfnaður með vaktatörnina þannig að þessu fer alveg að ljúka. Silla nýtur sig síðan í ystu æsar við að elda kræsingar og rétti hússins ofan í heimilisfólkið.

Veðrið hefur leikið við okkur, á mánudaginn var 30 stiga hiti og sól en síðan hefur kólnað að eins. Það hefur ringt í dag en það er bara gott mál því þá koma froskarnir. Arna Rún, Ómar og Ásdís Eva voru á froskaveiðum áðan og komu með einn heim. Í gær björguðum við síðan einum "stórum" froski. Ótrúlega gaman og það verður að segjast að hann Albert var sárt saknað. Er ég viss um að hann sé heimsmeistari í froskaveiðum.

Í gær fórum við síðan að kaupa grasfræ en komum heim með stórt borð og 7 stóla á pallinn. Nú er bara að sjá hvort sólbekkurinn fær að njóta rassa Begga eða Dodda á morgun en spáin hljóðar upp á heiðríkju og 22 stiga hita. Fyrstur vaknar, fystur fær.
Á döfunni er síðan pússun sólpallsins og ætla þeir kumpánar að aðstoða mig við það, fjallgöngur og hjóltúrar halda síðan áfram samkvæmt venju. Sem sagt nóg að gera og frábært útivistarveður þessa dagana og frábært að sjá hvað krakkarnir dafna vel í náttúrunni.
Frábært!

Komin heim - Ásdís Eva 5 ára!!!

2007-07-30T00:09:00.000+02:00

Jæja við komum heim á föstudaginn. Við lentum í Bergen kl. 13:30 og ég var farinn á vakt kl. 14:30. Ég fékk ekkert sumarfrí burtséð frá 2 helgum í allt heila sumar. Því miður gat ég ekki heimsótt helminginn af liðinu sem ég ætlaði að gera og það þykir mér miður. Ég sem ætlaði að hafa það rólegt á bakvöktum á FSA, en það breyttist í hið mótstæða. Ég vann fram til miðnættis nánast öll kvöld hafa gárungar haft það á orði að ég hafi komið með heilu biðlistana frá Noregi, slíkt magn var af sjúklingum sem þurftu á smíðakunnáttu minni að halda. Hamar, meitill, bor og skrúfur leystu golfkylfurnar af hendi og mislangir gangar FSA komu í staðinn fyrir Súlur og aðrar fagrar gönguleiðir er planlagðar voru í sumar.

Ég bið að heilsa öllum sem biðu eftir símtali eða dyrabjölluhringingu frá mér, ég hef enga afsökun. Þeim fáu er ég hitti, bið ég að steinheilsa.

Hér með er það kunngjört að þetta er síðasta sumarið sem ég ætla að eyða í smíðavinnu!!!

Að auki er ég búinn að ákveða að taka aðra "meðlimi" og "ánlima" fjölskyldunnar í langt og gott sumarfrí næsta sumar til Tenerif. Hér með staðfestist það og þið megið kalla mig hund ef ég stend ekki við þetta.

Annars var gott að koma heim. Núna er ég í vinnunni, á vakt, þeirri annarri í 16-vakta törn á 4 vikum. Klukkan 00:28. Ég tel mig verða góðan ef ég fer rétt með Grímskviðu eftir þetta ævintýri, þetta er náttúrulega bara bull, sjáiði bara hvað ég er búinn að skrifa hérna á undan, eitthvað mis......

Svo á prinsessan mín (því ég er vaktakóngur) afmæli í dag. Snótin er orðin 5 ára. Innilegar hamingjuóskir og hún fær vonandi frábæran dag. Hver hefði trúað því að ég væri ekki á vakt á afmæli dóttur minnar. Þetta en nú samt staðreyndin. Ég kem heim kl. 10 og get eytt deginum með henni.

Sindri Þór stóð sig svo eins og vera ber þrátt fyrir að hafa verið í sundskýlu á Ólympíuleikum æskunnar. Var rétt við Íslandsmetið sitt í 200 m flugsundi og komst í úrslit. Endaði síðan í 13. sæti sem var besti árangur Íslensku keppendanna. Frábært hjá kallinum. Hann kemur síðan heim 10. ágúst. Gott hann!

Afi Beggi, Doddi "móðurbróðir" og Arna Rún koma síðan eftir viku. Þá verður glatt á hjalla. Ef ég gleymdi að segja frá einhverju megið þið bæta því við í kommentin, ég er steindauður milli eyrnanna. Lifið.

Íslandsmet pilta hjá Sindra Þór !

2007-07-15T23:10:00.000+02:00

Já, hann Sindri Þór hefur lokið keppni á Norska Meistaramótinu í 50 metra laug sem fram fór um helgina í Namsos. Hann gerði sér lítið fyrir í morgun og bætti Íslandsmetið í piltaflokki í 200 metra flugsundi um hvorki meira né minna en 3 sekúndur. Gamla metið var 2:14,05 en Sindri synti á 2:11,06 mín. Glæsilegt það. Hann varð í 2. sæti í flokki 19 ára og yngri og í 4. sæti í flokki fullorðinna. Nú eru einungis 2,8 sek í Íslandsmet fullorðinna og pilturinn er bara 15 ára!!!
Hann gerði einnig góða hluti í öðrum greinum:

100 m flug: 59,96 sek.........3. sæti (10. sæti í senior)
200 m flug: 2:11,06 mín.....2. sæti (4. sæti í senior)
200 m fjór: 2:18,82 mín......4. sæti (5. sæti í senior)
400 m fjór: 4:52,71 mín......2. sæti (6. sæti í senior)

Aftur til hamingju Sindri Þór. Hann kemur síðan til Íslands á morgun en stoppar ekki lengið við því hann heldur til Serbíu á laugardaginn á Ólympíuleika æskunnar með Íslenska landsliðinu.

Sindri 6-faldur Íslandsmeistari

2007-07-01T20:15:00.000+02:00

Sindri Þór gerði aldeilis gríðargóða hluti á AMÍ sem var að klárast áðan. Hann gerði sér lítið fyrir og sigraði allar 6 greinarnar sem hann keppti í og setti 6 Akureyrarmet í piltaflokki og 5 met í karlaflokki. Ég sit eftir með sárt enni þar sem hann tók 5 met sem ég átti. Samt fínt að halda þeim innan fjölskyldunnar. Að auki varð hann stigahæstur í piltaflokki.

Hér sjáið þið hvað drengurinn var að gera:

1500 m skriðsund:.....16:26,76 ...... Akureyrarmet karla og pilta
400 m skriðsund:........ 4:10,98 ...... Akureyrarmet karla og pilta
400 m fjórsund:.......... 4:42,93 ...... Akureyrarmet karla og pilta
200 m fjórsund:........... 2:12,62 ...... Akureyrarmet pilta
200 m flugsund:.......... 2:09,74 ...... Akureyrarmet karla og pilta
100 m flugsund:.............. 58,33 ...... Akureyrarmet karla og pilta

Frábærir tímar og greinilegt að frystiklefinn, vel stundaðar æfingar, móðurnöldur, einbeiting og Bergenska regnið skreytt íslensku sjávarlofti hefur gert Sindra gott. Hann er ekki lengur efnilegur drengurinn, hann er einfaldlega drullugóður!!!
Til hamingju Sindri, frábært, frábært, frábært!!!

Of lengi í Noregi

2007-06-20T19:18:00.000+02:00

Þessa 3 daga sem ég og Ásdís Eva höfum verið hér á landi höfum við rekið okkur á ýmsa hluti og ýmislegt sem hefur fengið mann til að skilja að ræturnar sem binda mann við Bergen hafa styrkst og styrkst. Ég tók saman 10 atriði sem eflaust eiga eftir að verða brot af heildinni í lok sumars.

1. Ég fussa og sveia yfir verðlaginu á öllu.
2. Gleymdi að taka föt sem hæfa hitastigi lægra en 20 gráðum og hafgolu.
3. Hvaðan koma allir þessir jeppar?
4. Heitir pottar eru þvílík upplifun.
5. Ég segir "takk skal du ha" þegar þú þakkar fyrir þig í búðum.
6. Ég blótar á norsku.
7. Mér finnst skrítið að heyra fólk tala íslensku.
8. Ég tala við fólk sem ég bara kannast við, bara af því að ég hef ekki séð það í 2 ár.
9. Ég þurfti aðstoð 118 til að komast upp í Kópavog.
10. Ég hlakka til að fara heim.

Sumarfrí!

2007-06-13T23:00:00.000+02:00

Já loksins er hann aðeins farinn að kólna, hitinn fór mest upp í tæpar 31 gráður og var gárungum farið að finnast nóg um. Ég fer ef til vill að hallast að því að það sé eitthvað til í orðtakinu sem fjallar um hinn gullna meðalveg.

Ég var annars að setja örfáar myndir inn og með því kveðjum við í bili og sjáumst hress í sumar. Næsti pistill verður hamraðuar á lyklaborðið eftir sumarfrí.

Svo bendi ég á skemmtilegt myndband sem Kobbi gerði eftir að hafa verið í heimsókn hjá okkur í byrjun maí.

Algjör steik

2007-06-06T21:57:00.000+02:00

Heitt, heitt og heitt. Já það er varla líft þessa dagana hér í Fana. Í dag fór hitinn upp í 27 gráður hér í Fana og nær líklega 30 gráðunum um helgina. Allir hér eru orðnir vel sólbrenndir og alla fer að þyrsta í regn. Ég ætlaði að kaupa loftkælingu í húsið í dag en þær voru uppseldar þannig að ég geri aðra tilraun á morgun, því annars lifum við ekki helgina af. Ekki bætir úr skák að skýin láta ekkert á sér kræla.

Annars styttist óðum í að ég og Ásdís Eva komum til Íslands. Ætlum við að eyða helginni 15.-17. júní í nýja húsinu hjá Alfheiðargenginu og síðan fljúgum við til Akureyrar 17. júní.
Ásdís Eva á þ.a.l. bara 6 daga eftir í leikskólanum.

Silla verður síðan á "Østlandinu" um helgina á sundmóti. Verður þetta fyrsta mótið hennar án Sindra, utan Bergen svæðisins. Ég ætla að reyna að hafa ofan af liðinu á meðan. Einhverjar framkvæmdir verða líka þar sem Ásdís Eva ætlar að flytja sig alfarið inn í dótaherbergi og leyfa Snæsa að vera í friði í "Græna herberginu".

Ekki meira í bili, brennheitar kveðjur úr hitanum. Hade på badet!!!

Sumar og dugnaður

2007-05-30T10:51:00.000+02:00

Í gær var heitasti dagur ársins, 24,4 °C. Vifturnar hafa fengið tilverurétt og stuttbuxurnar urðu val dagsins hjá flestum meðlimum fjölskyldunnar.
Amma Stella kemur svo i dag og ætlar að vera hjá okkur í 3 vikur. Vonandi kemur hún með stuttbuxur.

Ég er orðinn hrikalega duglegur, að mér finnst. Á laugardaginn hljóp ég 17 km, á sunnudaginn gekk ég upp Stoltzekleiven með fjölskyldunni, á mánudaginn hjólaði ég tæpa 40 km og í morgun kl: 6:00 hjóp ég 10 km áður ég hélt til vinnu. Geðbilun, hreysti, dugnaður eða rugl?
Hver veit nema ég feti í fótspor Baldurs og hlaupi maraþon við tækifæri. Arnar, ertu ekki með?
Svo langar mig líka að fara "7-fjellsturen" næsta ár. Þá er gengið/hlaupið á öll sjö fjöllin í kringum Bergen. Samtals um 35 km. Hér er ekki tekinn tími en fróðir menn segja að metið sé um 41/2 klst. Aðalmarkmiðið er víst að vera með en ég veit ekki hvað það þýðir. Í ár var fyrsti maður á um 51/2 klst. Það er alveg klárt að stefnan verður tekin á met og ekkert annað. Allt annað er bara tímaeyðsla og ekkert annað. Lífið er jú keppni frá upphafi til enda. Baldur, þú er með hér ekki satt! 25. maí er dagsetningin fyrir næsta ár.

Af öðrum er allt gott að frétta. Ómar Jr. er að fara að keppa í sundi í dag og er stefnan sett á met að sjálfsögðu. Gárungarnir í sundinu segja að snáðinn hafi allt sem þarf til til að synda 25 m skriðsund skemur en á 20 sekúndum. Það yrði þá 13 sekúndna bæting eða um 40% bæting.
Ásdís Eva getur ekki beðið eftir að komast til Íslands og hitta Arnhildi og Ömmu Dísu.
Hugur Sindra Þórs er svo allur á AMÍ þar sem stefnan er tekin á árangur dauðans. Strákurinn er í fantaformi og búast má við að hann hringi andstæðinga sína nokkrum sinnum.
Sigurlín Þóra er söm við sig, einstök manneskja. Heppinn ég!

Viðtal við Sindra í Bergens Tidende

2007-05-22T12:29:00.000+02:00

Já Sindri er orðinn frægur. Hann stóð sig auðvitað eins og hetja síðustu helgi þegar hann synti 1500 m skriðsund á 16:38 mín sem er bæting um rúmlega eina og hálfa mínútu. Reyndar byrjaði hann fyrstu 800 m á 8:50 en ekki 8:57 eins og stendur í greininni.
Auðvitað varð uppi fjaðrafok, ys og þys vegna árangursins. Sindri Þór var fram á kvöld að gefa eiginhandaráritanir og símtölum frá æstum múgnum hefur ekki linnt. Frægðin hefur þó eigi stigið piltinum til höfuðs og átti hann bara rólega dag heima í gær í faðmi fjölskyldunnar. Hann hefur gefið það út að þetta eigi ekki eftir að breyta lífi hans á nokkurn hátt og að hann reyni eftir fremsta megni að lifa eins og hefðbundinn íslenskur, saklaus sundpiltur.
Kíkið á viðtalið hér.

Eins Ómars aðgerð!

2007-05-16T23:16:00.000+02:00

Hér á Bæklunardeild Haukelands Háskólasjúkrahúss hafa menn tekið upp nýja tímaeiningu. Kalla menn eininguna "Ómar" en hún mælir tíma í mínútum og er 1 x Ómar=18 mínútur.

Mælieiningin varð til þegar ákveðinn ofvirkur, snarbrjálaður, hýperaktífur, æstur, ákveðinn og kappfullur bæklunarlækniskandidat frá Íslandi fixeraði mjaðmabrot á 18 mínútum og setti þar með met sem hann átti reyndar sjálfur. Gamla metið var 19 mínútur. Þess má geta að áætlaður aðgerðartími fyrir svona aðgerð er um ein klukkustund.

Eftir þetta tala menn um "Eins, tveggja, þriggja, fjögurra, fimm eða sex Ómars aðgerðir" allt eftir því hve langan tíma aðgerðin tekur. T.a.m. tekur "þriggja Ómars aðgerð" um 54 mínútur.

Reikna stjórnendur spítalans með því að heimfæra eininguna á allar deildir spítalans fyrir sumarfrí og í árslok mun tímaeiningin leysa allar aðrar tímaeiningar af hólmi í öllum aðildarríkjum WHO.

Hér er samsvarandi aðgerð. Aðgerð sem að öllu jöfnu myndi teljast þriggja Ómars aðgerð en fór skyndilega niður í eins Ómars aðgerð þegar rétt var haldið á hnífnum. Enginn kellingatími það!

Annars höfum við haft það afar gott. Kobbi og Amma Ragga voru hjá okkur í viku og vonum við að þau hafi haft það gott. Amma Stella kemur svo í júní og þegar við komum heim frá Íslandi fáum við Afa Begga, Dodda og Örnu Rún í heimsókn. Þá verður sko fjör á bænum. Ég hvet hér með Dodda Móða að byrja að koma sér í form því hann verður dreginn á fjöll, í göngutúra, í hlaupatúra og hjólatúra daginn hægri vinstri. Þá þýðir ekkert að grenja úr sér eistun og kalla á mömmu því hún verður ekki á staðnum! Og Doddi minn, það verður enginn bjór fyrr en eftir túr.

Jæja, nú er klukkan einn Ómar yfir miðnætti, best að fara að lúlla því að 17. maí er á morgun og þá er að ganga skrúðgöngu að hætti Norðmanna. Til hamingju Norðmenn!

OBS nýjar myndir!

Mikið um að vera

2007-05-08T23:49:00.000+02:00

Jæja, ég skal viðurkenna að ég hef ekki verið duglegur að slíta lyklaborðinu undanfarið.
Annars höfum við haft gesti. Kobbi og Amma Ragga hafa verið nú hjá okkur í viku og hefur það bara verið einstök ánægja. Þau halda síðan heim á leið á fimmtudaginn.
Rakel, Eyji og Lára litu við og fengu að gista. Rakel er bekkjarsystir mín góð og fær vonandi stöðu sem á deildinni minni með haustinu. Það er bara gott um það að segja. Þá helmingi fleiri Íslendingar á bæklunarskurðdeild Haukelands sjúkrahússins.

Annars get ég sagt ykkur að ég hef ekki svikist undan með fótahlaupin. Baldur vinur minn fékk mig til að kaupa Garmin Forerunner 305 GPS púlsklukku með meiru og hefur það skilað sér í því að ég er orðinn hlaupagarpur mikill. Þessi græja býður upp á óteljandi möguleika og þessa stundina er ég að reyna að smita Arnarinn. Ég keypti mér líka pró-hlaupaföt (svona þröng og h.....leg) og einhverja rosa flotta skó sem fóturinn minn passar bara í. Ekki slæmt það. Ekki vissi ég að það væri hægt að eyða 70 þús kalli í hlaupagræjur.
Hlaupaæfing kl: 06:00 í fyrramálið.

Sumarið verður án efa gott. Ég fékk í dag góða stöðu á Bæklunardeildinni á FSA og fæ að vinna þar sem sérfræðingur í sumar. Því miður verða Árborgarar að sjá á eftir mér og það þykir mér miður en að sama skapi geta Akureyringar látið sér hlakka í hamsi.
Ég og Ásdís Eva komum saman til Íslands föstudaginn 15. júní og höldum að öllum líkindum beint til höfuðstaðar Norðurlands. Annars fékk Ásdís Eva pláss á leikskólanum hér við hliðina á okkur frá og með 1. ágúst og þá sparast 85 mín í akstur á dag sem eru góðar fréttir.
Lifið lengi.

Þessi yndisfagra mynd var tekinn rétt áðan í hjólatúrnum.

Fastur í lyftu í Røros

2007-04-23T22:15:00.000+02:00

Ég var fastur í lyftu í 15 mín í dag. Dyrnar opnuðust bara ekki. Samt þorði ég ekki að ýta á neyðarhnappinn, þennan sem maður þarf að halda inni í 3 sekúndur. Ég hugsaði, ég grandskoðaði lyftuna gaumgæfilega í króka og kima. Það var ekki fyrr en hreinlega ýtti á málningaafflagnandi hurðina þegar hún opnaðist. Eru ennþá til lyftur þar sem maður þarf að opna sjálfur, ég bara spyr. Hér verð ég fram á föstudag. Annars er bærinn fallegur og öll húsin frá 17. og 18. öld og nánast öll friðuð. Hér búa um 3700 manns og hafa íbúar afkomu að ferðamannaþjónustu og smáiðnaði. Eins og flestir vita er Røros einn af elstu bæjum Noregs og er hann líklega þekktastur fyrir koparnámurnar.

Svo fer að styttast í sumarið, ég kem til Íslands 15. júní og lestina reka hin 22. júní.

Eitthvað verð ég að sinna sársjúkum sjúklingum Selfoss sem og vonandi aðþrengdum andvaka Akureyringum. Sindri Þór syndir sumarið sæla og Silla og börn slappa af í sundlaugum landsins og láta gott af sér leiða. Herskarinn heldur síðan aftur heim 27. júlí en lestina að þessu sinni mun Sindri reka 11. ágúst.

Góðar stundir.

Geilo 2007

2007-04-15T01:06:00.000+02:00

Jæja þá erum við komin úr 6 daga skíðaferð til Geilo. Við náðum 4 heilum frábærum dögum í frábæru skíðafæri, glampandi sólskini og í frábærum félagsskap. Við gistum í risatórum Norskum Hytta með Ágústi og fjölskyldu og Baldri og fjölskyldu. Þetta var í einu orði stórkostlegt, frábær félagsskapur, yndislegt veður og gott skíðafæri. Krakkarnir voru að fíla þetta algjörlega í botn og voru síðustu dagana voru bláar og rauðar brekkur engin hindrun fyrir þau.

Ég get slegið því föstu að hjá okkur verður þetta árlegur viðburður og þið eruð velkomin með, hvenær sem er.

Annars byrjar hið hefðbundna líf á mánudaginn með vinnu, skóla og meiri vinnu. Ég held síðan á ráðstefnu í Røros í þarnæstu viku og verð í viku.

Sindri kemur heim á mánudaginn en hann er nú staddur á alþjóðlegu sundmóti í Luxemborg.

Veðrið hjá okkur hefur verið fínt, 17 stiga hiti og heiðríkja í dag og líklega á morgun en síðan á eitthvað að kólna.

Amma Ragga og Kobbi koma síðan í heimsókn í byrjun maí og hlökkum við mikið til.

Nóg í bili, lifið glöð og fallega. Hér eru svo myndirnar, værsågod!

Gleðilega páska!

2007-04-04T21:14:00.000+02:00

Gleðilega páska öll og allir. Á meðan við tökum okkur til í viku skíðaferð til Geilo þá vonum við að allir hafið það sem allra best. Ómar Snær og Ásdís Eva biðja að heilsa öllum og Sindri Þór biður að heilsa frá Póllandi þar sem hann er í æfingabúðum.

Féllum heldur betur fyrir 1. ápríl gabbi!!!

2007-04-02T22:07:00.000+02:00

Eins og sumir vita og hafa séð að þá eru Norðmenn duglegir að vera í svokölluðum "refleksvestum" við öll tækifæri. Þetta eru svona gul vesti með endurskini. Mig minnir að á Íslandi séu það helst vegavinnukarlar sem klæðast svona vestum. Hér eru allir í svona, jafn að degi sem nóttu, sama hvort þú ferð út að hjóla eða í partý, alltaf eru í þessu blessaða vesti svo að þú verðir ekki keyrður flatur. Þetta er nú allt gott og blessað og það var meira að segja verið að færa í lög 1. mars að maður ætti að hafa a.m.k. eitt slíkt vesti í bílnum ásamt hazardþríhyrning.

Í gær kom hins vegar frétt í Bergen Avisen þar sem það var tilkynnt að 1. október væri skylda að hafa eftirfarandi búnað í hverjum einasta bíl:

1. Fyrstuhjálpar-púði

2. Höfuðljós

3. Reipi

4. Teppi

5. Rúðupiss

6. Skrefateljari!!! (á að vera léttara að finna bílinn á radar)

7. Pundmælir

8. Dekkjabætur í boksi

Og að auki við keyrslu yfir 400 m yfir sjávarmáli:

9. Snjóskófla

10. Rúðuskafa

11. Keðjur á dekk

12. Lásaolía

Allt var að vera EU-staðal. Refleksvestið varð að vera staðsett max eina armlengd frá bílstjóranum og þetta átti að gilda um hluta græjanna, sem sagt allt í 70 cm radíus.

Sektin fyrir að hafa þetta ekki allt á hreinu skuli vera um 8500 ISK. Þeir viðurkenna þó að þetta sé dálítið skammur tími til að færa þetta í lög og að í minni bílum geti þetta skapað plássvandamál. Einnig er startpakkinn á um 22 þús ISK en argumentið er þá að þeir sem hafi efni á að keyra um á bílum eigi að geta fjárfest í hefðbundnum öryggisbúnaði.

Ég og Silla fengum létt sjokk þegar við lásum þetta. Ég var sá fram á að þurfa að kaupa tvö sett af háfjallapakkanum, þ.á.m. 8 keðjur og 2 skrefateljara, eitthvað sem ég vissi ekki að væri lengur til sölu fyrir hvíta menn. Ég sá mánaðarlaunin fjúka á augabragðið, fyrst í sektir og svo í þessar rosa græjur.

Það má segja að mér hafi orðið léttar um sálu þegar ég las að þetta hafi verið aprílgabb en að sama skapi leið mér eins og hálfgerðum heimskingja og sauðhausi að hafa fallið fyrir þessu.

Þetta bætti sem sagt ekki á sjálfstraustið þegar manni líður eins og fávita og fífli þegar maður reynir að æla þessari barnanorsku út úr sér við fullorðið fólk. Guð hjálpi mér og þér.

Breyttir tímar

2007-03-28T13:37:00.000+02:00

Af mér

Jæja, vitið þið hvað?

Ég vaknaði kl: 05:10 í morgun, keyrði Sindra á sundæfingu og hljóp síðan 8 km áður en ég dreif mig í vinnuna kl: 07:10. Hefur undirritaður hug á að halda þessu áfram og láta krossaband fylgja kviði með aktífum æfingum næstu vikur. Nú vonum við bara að þetta haldi út lengur en í dag!!!

Af okkur

Annars heldur góða veðrið áfram. Það styttist í viku skíðaferðalag með heiðríkju logni og hlakkar stórt í okkur.

Sindri heldur síðan til Póllands á sunnudaginn til æfinga og þaðan til Luxemborgar til keppni. Það fer að nálgast tuginn hvað varðar utanlandsferðir það sem af er árinu.

Af Bergen

Loksins eru þeir að klára að malbika þennan 800 metra kafla frá Lagunen að göngunum. Þetta tók ekki nema 40 ár!!!! Ég er að meina það, það er búið að taka 40 ár að malbika þennan ómerkilega vel og byggja þessi 150 metra löngu göng!!!! Íslendingar hefðu klárað þetta á hálfu ári, alveg klárt og þá er ég að tala í alvöru.

Svo er verið að tala um að leggja "Bybane" gegnum Bergen. Mér þykir gott ef því líkur á næstu öld. Gott Norðmenn!!!!

Af Noregi

Heiðríkja yfir öllu Noregi.

Norðmenn töpuðu síðan fyrir Bosníu 2-1 í undankeppni EM og það má eiginlega segja: "Gott þið!". Norðmenn eru sem Íslendingar, heimsmeistarar í að vera heimsmeistarar fyrir leikinn!!!!

Af sundi

Hann Michael Phelps okkar bætti eigið heimsmet um tæpar 2 sekúndur í 200 m flugi, 1:52,09 mín sem er BARA gott. Til hamingju Mikki!!!!

http://www.mbl.is/mm/sport/frett.html?nid=1261583

Sannkallað sól og sumar

2007-03-26T14:54:00.000+02:00

Jæja, veðurguðirnir elska okkur hér í Bergen, a.m.k. þessa dagana. Í gær var 17° stiga hiti niður í miðbæ og 19° stiga hiti hjá okkur í Fana. Úti á palli voru ekki nema 35° C.

Það verður áframhald á þessu og það er alveg ljóst að sumarið er komið. Í dag er heiðríkja og það eru áræðanlega um eða yfir 20 gráðurnar í dag. Ekki sem verst.

Við héldum afmælisveislu fyrir djúníorinn og tókst hún með prýði. Ég komst m.a. annars að því að óþægni hefur allt aðra merkingu en ég hélt.

Ofvirkur+ofvirkur+einhverfur=500 dB hávaði og matarslettur út um allt.

Einhver góður maður sagði að það væri allt í lagi að vera með fíflagang svo fremur að það færi ekki út í sprell.

Myndir

2007-03-20T00:49:00.000+01:00

Var að setja nokkrar myndir inn. Annars varð Ómar Snær 7 ára í dag og tíminn líður greinilega miklu hraðar en manni óraði fyrir. Hann fékk nýtt hjól og Ásdís Eva gat ekki staðist mátið og keypti sér líka hjól. Enda hjólatúrar gríðarlega ofarlega á listanum hjá okkur næstu vikurnar.

Annars er vorið komið og greinilegt að börnin eru með árstíðirnar á hreinu:
Ég: "Hvaða árstíð kemur á eftir vori"?
Ómar Snær: "Sumar".
Ég: "En á eftir sumri"?
Ómar Snær: "Haust".
Ég: "Og hvað kemur svo"?
Ásdís Eva: "Snjór"!!!
Ómar Snær: "Nei Ásdís, gott þú, á eftir hausti koma jól"!!!

Sviðakjammar og rófustappa

2007-03-15T19:29:00.000+01:00

Já ég er á leiðinni að bragða á norskum sviðakjömmum og rófustöppu. Ég hef grun um að hér sé um að ræða reykt svið. Hákarl verður það víst ekki og ég held að ég geti gleymt því að fá eistun góðu.

En annars er ég staddur í Voss á kúrs. Mér fer mikið fram á skíðum og er farinn að fara á toppinn og bruna niður. Einhver sagði að ég ætti eftir að lenda inni á skurðstofu hjá sjálfum mér ef þetta héldi svona áfram en ég er ennþá heill.

Sindri er síðan á Íslandsmeistaramótinu í Reykjavík og ég het alla til þess að halda leið sína í Laugar og sjá piltinn verða Íslandsmeistara í 200 metra flugsundi á laugardaginn!!!

Ég á svo afmæli eftir 2 daga og Ómar jr. þann 19. mars. Ég bíð spenntur eftir því að sjá hvað þið sendið mér í afmælisgjöf. Adressan er Smedsvikneset 1 A, 5243 Fana, Norge.

Ef þið viljið gefa mér pening er reikningsnúmerið hjá mér 0111-26-17756.

Erill

2007-03-10T22:45:00.000+01:00

Hér er allt gott að frétta. Mjög mikið á döfunni á öllum vígstöðvum.
Amma Dísa kom í gær til þess að vera með krökkunum næstu vikuna þar sem ég verð á ráðstefnu og skíðaferð í Voss.
Silla hefur legið í flensu síðustu daga en er öll að hressast og ætti að vera klár fyrir sundmót næstu helgi.
Sindri Þór heldur síðan til Íslands á miðvikudaginn til að taka þátt í ÍM50 sem fram fer næstu helgi. Þar ætlar hann sér stóra hluti. Annars verður hann varla heima næsta hálfa árið ef allt fer sem í stefnir. Eftir Íslandsmeistaramótið, þ.e.a.s. 1. apríl heldur hann til Póllands til æfinga og fer svo þaðan á alþjóðlegt mót í Luxemborg um miðjan apríl.

Ómar Snær heldur því fram að gamlar feitar konur geti ekki keyrt bíla og Ásdís Eva svífur um á bleiku skýi síðan Amma Dísa kom.

Því miður koma engar myndir inn fyrr en næstu helgi. Lifið heil.

400 fjór á 4:48,60

2007-03-05T11:41:00.000+01:00

Í gær synti Sindri seinna sundið sitt á Norska meistaramótinu. Hann synti 400 metra fjórsund á 4:48,60 sem er 8 sekúndna bæting.
Glæsilegur árangur hjá sundkallinum okkar á mótinu.
Þess má geta að Sindri var eini sundmaðurinn fæddur 1991 sem komst í úrslit á öllu mótinu. Ekki slæmt það!!

200 flug: 2:09,55 !!!

2007-03-03T22:06:00.000+01:00

Kallinn synti sig í 5. sætið á Norska meistaramótinu sem fram fer í Osló þessa dagana. Bætti sig um 6 sekúndur, 200 flug á 2:09,55 mín sem er BARA GOTT!

Þetta er 3 sek betra en minn besti tími og ekki orð um það meir!!!

Vorið er komið

2007-03-02T23:58:00.000+01:00

Fyrst af öllu ber mér að nefna og ekki að ástæðulausu að við höfum ákveðið að nota ekki netfangið sem hefur staðið hér á síðunni. Því hef ég tekið það út og sett okkar "hefðbundnu" netföng. Gjörið þið svo vel.

Já það er komið vor. Gróðurinn er að taka við sér og hitinn stígur. Næstu viku mun hitinn mögulega fara yfir 10 gráður samkvæmt áreiðinlegum spám. Gott mál.

Sindri Þór er í Osló á Norska Meistarmótinu. Þar keppir hann í 200 m flugsundi á morgun kl: 09:30 og 400 m fjórsundi á sunnudaginn. Þeir sem vilja sjá tímana "læf" geta fylgst með hér, http://www.livetiming.no/livetiming/livetiming.asp

Við fórum í "tur" í dag og vorfílingurinn var ægilegur. Síðan fórum við í leikhús á Askeladden og skemmtum við okkur konunglega. Dagurinn var síðan kórónaður með fara út að borða.

Um helgina er ég síðan að vinna.

Ómar Snær missti aðra tönn í dag. Gott fyrir hann og tannálfinn.

Svo eru bara 6 dagar í ömmu Dísu og það er talið niður.

Ég man eftir þessu....

2007-02-26T15:12:00.000+01:00

Oft kemur upp í hugann afar fyndin og skemmtileg atvik sem hafa átt sér stað. Sérstaklega eru það ungarnir sem eiga heiðurinn af þessu. Í gær rifjuðum við upp tvö afar fyndin atvik og verð ég að segja að hláturtaugarnar kitluðust.

Fyrra atvikið kom upp úr krafsinu vegna þess að Sindri er núna í Voss á snjóbretti með sundfélaginu. Hann er að fara að keppa á Norska Meistaramótinu næstu helgi og því var það rætt hversu óhentugt það væri ef hann myndi nú slasast, tala nú ekki um ef hann myndi viðbeinsbrotna. En það hefur honum tekist að gera einu sinni áður, fyrir nokkrum árum.
Þá mun læknirinn hafa sagt að hann ætti að vera í FATLA í 2-3 vikur. Sindra leist ekkert rosalega vel á það og var næstum farinn að gráta, fannst það í raun það hræðilegasta sem gat gerst. Svo kom það upp úr krafsinu í gær að hann mun hafa misskilið lækninn svona hrikalega og tók þessu þannig að hann ætti að leggjast inn á deild fyrir FATLAÐA í 2-3 vikur!!!

Þar sem Ómar Snær er við það að missa allar tennurnar sínar rifjaðist það upp í gær þegar hann fór í flúor hjá Halldóri tannlækni á Akureyri þegar hann var líklega um 4 ára. Ómar Snær er frekar klígugjarn og því vildi það ekki betur til en það að eftir að hafa haldið ælunni í sér í nokkrar mínútur ældi hann á tröppurnar hjá Dóra á leiðinni út.

Ásdís Eva átti síðan frekar vandræðilega spurningu í gær. Hún sat og horfði á sjónvarpið rétt eftir kvöldmat, svo kom hún til mömmu sinnar og spurði:
"Mamma, af hverju var konan að binda manninn við rúmið?"
"Svo var hún ekki í neinum fötum og svo kom annar kall á brókinni, ha mamma, af hverju gerði hún það?"

Já, af hverju ætli hún hafi verið að þessu ég bara spyr. Það skal samt tekið fram að hér var um að ræða fjölskyldumynd leyfða öllum aldurshópum þannig að þetta hlýtur að hafa verið eitthvað óhapp bara.

Pottþéttur Arnarson

2007-02-24T01:44:00.000+01:00

Já það má með sanni segja að drengur þessi er gríðarfagur. Engar hrukkur og læti!

Dette må jo være drit bra, helt perfekt altså!!!

Drengur er fæddur

2007-02-21T14:59:00.000+01:00

Við óskum Ingu Mæju og Arnari innilega til hamingju með litla snáðann sem fæddist í gær. Öllum heilsast vel. Arnhildur og Albert, til hamingju með litla bróður. Við bíðum spennt eftir myndum.

Annars er allt gott að frétta af okkur. Við fórum á skíði um helgina og skírnarveislu hjá Ágústi og fjölskyldu. Helga Vala fékk nafn sitt skráð á löggildan skjalapappír.

p.s. áfram Eiki bleiki!

Afmælisbarn dagsins

2007-02-13T10:58:00.000+01:00

Sigurlín Þóra er afmælisbarn dagsins.

Hjartans knús frá öllum hér í Fana og við gerum allt til þess að gera daginn sem ánægjulegastan fyrir afmælisbarnið líkt og vanalega.

Datt aldrei!

2007-02-12T07:11:00.000+01:00

Jæja, þá er það afstaðið. Ég fór með ungana á skíði á laugardaginn í www.Eikedalen.no . Fyrir þetta hafði ég ALDREI farið á skíði. Ég keypti mér Carving skíði til að geta verið meira með Ásdísi Evu á skíðum þar sem Ómar jr. bjargar sér vel aleinn á brettinu. En hvað um það, það er skemmst frá því að segja að ég datt aldrei! Ég fór fyrstu ferðina í lífinu með Ásdísi Evu fyrir framan mig haldandi í skíðastafina án þess að detta. Ég gat meira að segja beygt! Svo fór ég nokkrar ferðir aleinn og reyndi bara að gera eins og Ingemar Steinmark og Kjetil André Aamodt. Ég náði a.m.k. að sviga niður án þess að vera í "plóg" og þetta gekk bara framar vonum. Er ég ánægður með sjálfan mig og gef mér hiklaust 10 í einkunn fyrir dugnað, framfarir og stíl. Krakkarnir frá sömuleiðis 10 í einkunn fyrir að vera þolinmóð og hlægja ekki að pabba sínum.

Annars var þetta frábært, glampandi sól og fullkomið skíðafæri. Það verður sko pottþétt skíðað næstu helgi og þá skal ég sýna Sindra og Sillu hvar Dabbi verslaði ölið, það verður keppni dauðans!!!

Sindri Þór keppti síðan um helgina. Var hálfveikur og í dag liggur hann í rúminu. Gerði samt sem áður ágæta hluti. Fór m.a. 400 skrið á 4:17 mín sem er 14 sek bæting og 100 skrið á 57 sek sem er 2 sek bæting. 50 flug fór hann á 28,4 sek og 50 skrið á 26,3. Vel af sér vikið eins og vanalega hjá piltinum.

Bið annars að heilsa öllum, hér gæti það ekki verið betra hjá okkur. Rosalega fallegt veður, glimrandi skíðafæri og fjölskyldulífið gengur eins og í sögu. Ómar Snær byrjaður á æfa aftur í "alvöru" hóp með 9 og 10 ára krökkum og fór m.a. 150 metra flugsund fyrstu æfinguna sína.
Vona að þið hafið það sem allra best.

p.s. Sigurlín Þóra fyllir síðan 41. árið á morgun 13.02.2007.

Meinfærslur

2007-02-08T23:19:00.000+01:00

Ég hef ákveðið að gera tilraun þess efnis að skrifa meinfærslur stöku sinnum. Telur undirritaður að ákjósanlegt sé að breiða læknisfræðilegan kunnskap sinn út á meðal vina og ættingja. Munu þetta verða yfirlit yfir algenga sjúkdóma eða meinsemdir, "vandræðalega" kvilla, s.s. andremmu, táfýlu, útbrot á viðkvæmum stöðum eða þá almenn umræða og vangaveltur um ástand, almennan misskilning, vitleysisgang, heimsku, helti og þannig mætti lengi telja.

Þrátt fyrir að flest verði byggt á "evidence based" vitneskju mun persónuleg reynsla, tilfinning, getgátur, spár og fordómar koma sterkir inn þannig að ég get ekki ábyrgst allar ráðleggingar/sanngildi þess er ritað verður. Vona ég þó að þetta geti orðið hjálparhella í leit að sannleikanum og hver veit nema sannleiksgildið og notgildi textans verði af og til meira en skemmtanagildið.

Heimsmet í grillun?

2007-02-02T23:47:00.000+01:00

Ég hef líklega slegið Bergenskt heimsmet í dag. Ég grillaði annan daginn í röð. Í gær fengu tveir holdakjúklingar að grillast á fína Weber kjúklingahöldurunum (sem er algjör snilld og allir sem grilla að ráði verða að eignast). Og í dag voru það nautafillet og svínafillet að hætti hússins. Ég er 98% viss um að ég var sá eini sem var að grilla í gær í Bergen, jafnvel Noregi (hugsanlega Ágúst) og 99,9% viss um að ég er sá eini sem grillaði tvo daga í röð!!!
Fólk heldur eflaust að ég sé genginn af göflunum, að vera að grilla um miðjan vetur, og ekki bara einn dag, neinei, tvo daga í röð. Fólk kom út í dyrnar og ég heyrði raddir tala um hvort ég væri eitthvað skrítinn. Teknar voru myndir af mér og ég er nú talinn sá brjálaðisti í hverfinu, ef ekki í heilu Bergen. Ekki kannski skrítið þar sem opinbert og samþykkt grilltímabil Norðmanna er Júní-Ágúst.

Ég sé fyrir mér fyrirsögn í BA á morgun:

"Politiet tilkalt på åstedet hvor en sannsynligvis psykisk utviklingshemmet mann grillet både torsdag og fredag i Februar!!!!"

Missti tönn og lærði að reima á 2 mínútum

2007-01-30T00:35:00.000+01:00

Ómar Snær missti sína fyrstu tönn í fyrir skemmstu. Það vildi þó eigi betur til en svo að hún endaði í mallakútnum og liggur að öllum líkindum á botni hins stóra hafs.

Eftir þetta lærði hann svo að reima skóna sína eftir 2 mínútna kennslu þannig að það má með sanni segja að þetta hafi ýtt honum skrefi framar í að fullorðnast.

Af og til finnst mér þó að Ómar Snær megi slaka aðeins á í að fullorðnast. Hann er jú bara 6 ára en leikur sér ekki með dót. Hann spilar tölvuleiki, downloadar FM tónlist af netinu, er með MP3 spilarann í gangi daginn langan og klæðir sig eins og 16 ára unglingur. Sokkar verða að vera í stíl við buxurnar og bolurinn verður að vera í stíl við hárið. Hárið verður svo að vera vandlega "ruglað" með dýrasta hár"muddi" bæjarins.

Hér er ekki verið að safna sér fyrir, bílum, boltum eða Legói, nei hér eru Koss heyrnartól, labtop, iPod video og diesel gallabuxur efst á óskalistanum.

Annars koma Silla og Sindri heim á eftir. Þau hafa nú dvalið á Fróni í 10 daga í æfingabúðum/sundmóti ásamt Delfana. Allt gekk samkvæmt óskum og eru Norðmenn yfir sig hrifnir af landi og þjóð að mér skilst. Íslenskar sundlaugar eru víst þær bestu í heiminum.

Annars gerði Sindri sér lítið fyrir og sigraði 200 m flugsund á mótinu, Reykjavik International, synti á 2:16,70 sem er ekki sem verst. Þetta var að sjálfsögðu í 50 metra laug. Hann bætti sig um heilar 6 sekúndur. Þetta er 2 sek betra en undirritaður átti best og mér ber því að spyrja, má þetta? Er þetta löglegt? Kvikindið er bara 15 ára, tekur bara 30 kg í bekkpressu og er ekki búinn í mútum!

Annars gerði hann gríðargóða hluti sömuleiðis í öðrum greinum, synti m.a. 100 m flugsund á 1:02,49 og 50 m flugsund á 28,30 sek.

Að lokum,

Spá: Ísland-Danmörk, 29-26

Hættulegur dvergur

2007-01-23T23:08:00.000+01:00

Hvar er sólin um nætur?

Hví er sykurinn sætur?

Því eiga ekki hanarnir egg?

Af hverju eyða díselvélar að jafnaði minna en bensínvélar?

Hvers vegna tvískattur?

Þetta eru kunnulegar spurningar sem öll börn velta fyrir sér einhvern tíma á lífsleiðinni. Þið ykkar sem eigið börn hafið eflaust kæst yfir mörgu því er börnin hafa látið út úr sér.

Okkar börn eru engin undantekning þrátt fyrir að vera blendingar og hálfskáeygð.

Síðustu mánuði hafa Ómar og Ásdís látið svo margt ótrúlegt út úr sér að maður trúir því varla að þau séu lituð. Ómar er greinilega ekki svo spinnigal og verður maður sífellt að hugsa áður en maður segir einhverja vitleysu. Einhvern tíma notaði ég þau rök þegar beðið var um tölvuleik/dót, að ég ætti ekki pening og því verð ég nú að hafa verulega góð rök fyrir öllu sem ég kaupi, sérstaklega ef það er ekki matur eða nauðsynjafatnaður því annars er mér núið því um nasir að ég eigi ekki pening eða hvernig standi á því að ég geti keypt þetta.

Hann er verri en konan!!!

Bara í dag komu nokkur skondin atvik upp. Ásdís spurði hvort ég fengið útborguð laun í svona og benti á spilakassa en Ómar leiðrétti hana fljótt og upplýsti hana um að það væru sjúklingarnir sem borguðu mér peningana sem þeir fengu frá löggunni.

Skömmu síðar mættum við dverg í verslunarmiðstöðinni og Ásdís hló, benti og öskraði: ,,Sjáðu tannálfinn pabbi!"

Þegar ég fræddi hana um að þetta væri dvergur spurði Ómar alvarlegur á svip: ,,Eru dvergar hættulegir?"

Á leiðinni heim var ég síðan beðinn um að hægja á ferðinni því annars fengi ég bréf í póstkassann!!!

Hvað á þetta að þýða?

2007-01-22T23:55:00.000+01:00

Tilgangslaust og aftur tilgangslaust. Það rigndi bara í 85 daga í röð. Af hverju þurfti hann að haldast þurr í gær. Nú verðum við að byrja upp á nýtt ætlum við okkur að ná 87 daga metinu. Þetta er bara tilgangslaust.

Heiðríkja í gær, á algjörlega röngum degi. Ég beið og vonaði, spennti greipar en aldrei komu skýin, aldrei kom dropi úr lofti. Sólin með sitt Sólheimaglott hætti ekki að skína fyrr en klukkan var að nálgast fjögur. Djöfulsins dónaskapur að láta vart sjá sig í 85 daga og koma síðan og hanga yfir manni heilan dag og skemma fyrir manni Noregsmetið í þokkabót!
Nú þarf ég að byrja allt upp á nýtt eins og Jón Oddur (eða Bjarni) sagði einhver tímann.

Að lokum, hvað voru Frakkar að hugsa. Gott þeir!!! Íslendingar eru nú ekki með svona frábært lið.

Sólin skein í gær!

2007-01-21T00:45:00.000+01:00

Ég sá sólina í annað skiptið síðan 2. október í gær. Það var mjög ánægjulegt en það liðu ekki nema örfáar mínútur þar til himininn tók að skyggja, drungaleg ský og yfirþyrmandi myrkur lagði yfir allt. Síðan fór að rigna.
Dagurinn í dag er sá 85. í röðinni, þá vantar bara 3 daga í það að við sláum Noregsmetið í samfelldum rigningadögum. Metið er 87 dagar í röð, sett í Bærum 1979.
Þrátt fyrir ógeð, hatur, leiða, fyrirlitningu og enn meira ógeð á rigningunni vona ég að hún haldist í 3 daga til viðbótar. Þá kannski sér maður einhvern tilgang ef að tilgang má kalla. Og af hverju getur þá ekki bara rignt í 19 daga í röð, þá sláum við "óstaðfesta" metið frá Fana/Stent síðan sautjánhundruðogsúrkál. Þá verður sko fagnað hér í Smedsvikneset, kampavín og margra daga partý, ábyggilega. Ekki slæmt að hafa búið í Noregi í 16 mánuði og strax vera búinn að stimpla sig í metabókina.

Annars er veðrið farið að síast svo inn í mitt sálartetur að ég er farinn að skoða heimasíður sólstrandaferðaskrifstofa þrátt fyrir að eiga engan möguleika á að fara.
Ég hlakka óendanlega til sumarsins. Sumarið er tíminn. Ég hlakka til að sjá sólina, hlakka til að geta fundið ilinn frá ilmandi geislum hennar, fundið hvernig sálin lifnar við og hvernig...........

Annars er það að frétta af okkur að "S"-in tvö, Silla & Sindri flugu á Frón í gær. Þar eru þau ásamt sundfélaginu hans Sindra í æfingabúðum og að lokum taka þau þátt í Alþjóðlegu Sundmóti Ægis næstu helgi. Gaman að því.
Ég hef því gerst ofurfaðir dauðans tímabundið. Þar sem ég fékk ekki frí og Silla í raun ekki heldur þarf ég að mæta til minnar hefðbundnu vinnu og síðan leysa Sillu af þegar heim er komið. Í dag var ég með hópinn hennar á sundmóti og það er skemmst frá því að segja að krakkarnir voru að gera gríðarlega góða hluti og Silla hefur greinilega sýnt þeim hvar Davíð keypti bjórinn síðustu vikur.
Til viðbótar skúraði ég hólf og gólf, þvoðið 4 vélar og bakaði snúða.

Að lokum sendi ég samúðarkveðjur til allra Chelsea aðdáenda. Sindri Þór, það gengur bara betur næst!
Áfram Liferpúl!

Jólamyndirnar komnar inn

2007-01-06T02:06:00.000+01:00

Við hér í Smedsvikneset óskum öllum gleðilegs árs og þökkum öllum sem skilið eiga frábærar stundir. Sérstaklega var gaman að hafa Ingu Maju, Arnar og börn sem og Elínu Maríu og Magga hjá okkur um jól og áramót. Þrátt fyrir 22 fótleggi gekk þetta eins og í jólasögu og hvergi urðu árekstrar. Viðrekstrar urðu þó gríðarmargir eins og von var á.

Á döfinni er svo Íslandsferð Sillu og Sindra 19.-29. janúar en þau eru að koma með Delfana í æfinga- og keppnisferð. Svo verð ég nú að reyna að rífa jólaskrautið niður, a.m.k. fyrir sumarið.
En endilega kíkið á myndirnar, röðunin klikkaði eitthvað en þær bragðast samt eins.

Myndir og nýtt verk!

2006-12-18T21:51:00.000+01:00

Var að setja nokkrar myndir inn í albúmið okkar.

Hér er svo nýjasta verk Ómars Da Vinci, "ókyrrð".

20 x 50 cm, bómull, acrýl. Verð: 15.000 ISK.

Annars bara 6 dagar til jóla og loksins í dag klæddist Smedsvikneset 1 A jólabúningnum.

Annars verður jólaveðrið með öðru sniði en við eigum að vera vön, 9 stiga hiti og rigning.

...og það rignir

2006-12-10T23:58:00.000+01:00

Nei, þetta ætlar víst engan endi að taka. Rigningin heldur bara áfram og áfram. Frárennsliskerfið í Bergen er hætt að taka við vatninu eins og myndin sýnir og það hlýtur að vera orðið eitthvað meira en lítið að þegar rigningin í Bergen er orðin aðalfréttaefnið út um heim.

Annars teljum við bara niður til jólanna. Nú tvær vikur og það er gríðarleg tilhlökkun á okkar bæ. Svo vonum við að Stekkjastaur sjái sér fært að koma til okkar næstu nótt.

Annars hef ég nánast ekki verið heima síðan í þarsíðustu viku því nú er ég að ljúka vaktatörn þar sem ég tek 6 vaktir á 13 dögum sem er eiginlega bara geðveiki. Síðasta vinnuvika innihélt samtals 19 klst svefn og 116 klst í vinnunni. Til að fullkomna þetta var Silla síðan að vinna föstudag-sunnudag.

Jólafríið verður því afar kærkomið.

Jæja, ég ætla að fara að undirbúa mig undir næstu aðgerð og ef þið heyrið ekki í mér í bráð er það örugglega vegna þess að ég brætt úr mér.

Enda þetta með sólinni, þeirri er ei hefur smogið gegnum sjáöldur augna minna síðustu 2 mánuði.

Rigning

2006-12-06T11:15:00.000+01:00

Hingað til hefur mér ekki fundist Bergen vera það rigningabæli sem ég bjóst við. Ég hafði fyrir flutnginn heyrt hræðilegar sögur um rigningu "dauðans" með flóðum, fossum, fljótandi húsum og bílum.
En nú hefur ringt upp á hvern einasta dag frá 15. október, heila 51 daga í röð. Úrkomumetið féll í nóvember, 584 mm en til gamans má geta að meðalmánuður í Reykjavík er 70 mm. Á síðasta sólarhring var úrkoman 150 mm sem er náttúrulega bara bilun. Síðasta sólarhring hefði það ringt samtals 900 lítrum í 6 fm dúkkuhús ef það hefði staðið úti án þaks.

En hvernig stendur á þessu?
Hvaðan kemur allt þetta vatn?
Er þetta leyfilegt spyr ég bara?

Svarið liggur að öllum líkindum í því að Bergensvæðið er umkringt 7 háum fjöllum. Ef ég man rétt frá því í VEÐ 103 frá því í MA þá hefur þetta eitthvað með mettunarstig loftsins að gera, þ.e.a.s. þegar loft kemur yfir fjall nær það mettunargildinu og það fer að rigna. Endilega leiðréttið ef ég fer með fleipur.

En hvað sem því líður hef ég ekki séð sól síðustu 2 mánuði.
Ég hef ekki klæðst öðru en regnjakka síðustu 2 mánuði og maður sér eiginlega ekki fram á að þetta hætti. Það eina jákvæða við þetta er að rafmagnsverðið ætti að lækka, eitthvað vonandi, kannski, líklega ekki samt.

Rennblautar kveðjur úr rigningu "dauðans".

Megavika hjá Ómar Da Vinci

2006-12-01T19:49:00.000+01:00

Jæja, ég var að öppdeita upplýsingar og verðlistann á myndunum mínum. Nú fara að hlaðast inn myndir og ég hvet ykkur til að kíkja annað slagið inn því ég er með hreint rosalegar hugmyndir í kollinum, bíðið bara. Verðið er líka hlægilegt eins og þið sjáið.

Tertukast verra en mannsdráp

2006-12-01T17:00:00.000+01:00

Já, réttarkerfið hefur ekki alltaf fengið minn fyllsta skilning, hvorki á Fróni né hjá frændum vorum Norðmönnum. Hinn 24 ára gamli Johan Waagaard á yfir höfði sér 15 ára fangelsi fyrir að kasta tertu í fjármálaráðherra Noregs, Kristin Halvorsen. Gott hann! Gott Norðmenn!

Annars dreymdi mig sérkennilegan draum í nótt. Ég mun hafa sturlast vegna leikfangs sem ég keypti handa Ómari Snæ. Ég skil mig reyndar ósköp vel í draumnum því þetta hefði eins getað verið raunveruleikinn. Hafið þið ekki keypt leikföng sem eru svo rækilega fest á pakkninguna að maður þarf helst að eiga vélsög, naglbít eða logsuðutæki til að geta náð umbúðunum utan af. Til hvers í ósköpunum að skrúfa einn lítinn leikfangabíl með tveimur 24 mm x 2,5 mm stálskrúfum í pakkninguna. Oftar en ekki er þetta annað hvort sexkantur eða einhverjar tékkneskar eða rúmenskar skrúfur sem passa ekki við nein skrúfjárn sem meðal maður á í verkfæratöskunni sinni. Síðast þurfti ég að saga skrúfurnar með stálsög við botninn á bílnum.

Svo fékk Ásdís Eva nýlega Bratz haus og með´onum, þ.e.a.s. greiðu, varalit, eyrnalokka, snyrtidót og fleira. Allt var þetta fast á spjaldi, hausinn fyrir framan og kassi með glæru fremst. Allt þetta litla smáa plastdót var fest svo hrikalega að ég mátti nota töng og vírklippur til að losa þetta. Tveir þykkir járnvírar voru notaðir til að festa 4 cm plastgreiðu. Þeim var snúið 8 snúninga hver og get ég sagt ykkur að það var ekki mögulegt að snúa þessu af með fingrunum. Nei, töng og vírklippur varð ég að nota. Hver skilur svona, a.m.k. ekki enda er ég nú bara þýðandi og þulur eins og einhver sagði.

Ég gæti haldið lengi áfram að tuða en ætla ekki að gera það því jólin eru að koma. Jólaskrautið fær brátt að líta dagsins ljós, fyrsti jólasveinninn fer að koma eftir 11 daga og eftir 21 dag verður heldur en ekki fagnaðarfundur þegar Arnar, Inga Mæja, Albert, Arnhildur og Maggi koma. Elín stóra systir kemur svo 27. desember.

Loksins myndir

2006-11-27T00:27:00.000+01:00

Jæja loksins hef ég náð að klessa nokkrum myndum á síðuna. Minnkaði þær 1000 falt þannig að gæðin hurfu en það var helv.... fljótlegt að hlaða þeim inn.
Annars tala myndirnar sínu máli. Mæli ekki með að skoða þetta með "slide show" þar sem myndirnar eru svo litlar. Næst skal e´g ekki alveg vera svona sparsamur á megabætin.

Svo náði Ómar Da Vinci að mála eina eftir pöntun, "eilífðin", olía á bómull. Njótið.

Sindri og Silla á IM 50

2006-11-19T01:03:00.000+01:00

Já, Sindri Þór er að gera góða hluti á Íslandsmeistaramótinu í sundi sem fram fer í Reykjavík nú um helgina. Hann er m.a. búinn að bæta Akureyrarmetið í 50 m baksundi 29,62 sek og svo synti hann 200 m flug á 2:15,86 sem er einungis 2 sek frá piltametinu mínu..... má þetta?
Í dag synti hann svo 400 m fjór á 4:56,21 sem er ekki nema 10 sek bæting.
Gaman verður að sjá hvað pilturinn gerir í 200 m fjóri og 100 m flugi á morgun.

Annars flaug Silla til Íslands á föstudaginn, það var eiginlega ekki ákveðið fyrr en á fimmtudagsnóttina. Án efa óvænt ánægja fyrir vini og fjölskyldu.

Við þrjú sem eftir sitjum höfum annars haft það gott. Hálfgert letilíf í gær en í dag á að fara í sund, fjelltur og grilla nautakjöt því það er uppáhald okkar þriggja. Hver veit nema við kíkjum í bíó.
Þangað til næst, sæl að sinni.

p.s. fyrir þá sem vilja fylgjast með Íslandsmeistaramótinu geta skoðað úrslitin hér.

Stutt yfirlit

2006-11-17T01:28:00.000+01:00

Það má með sanni segja að það hafi verið mikið að gera hjá manni síðustu dagana. Ég hef ekki haft tíma til að sinna skrifum og allur litli frítíminn hefur farið í einhverja bölvaða vitleysu.

Annars er það helsta að frétta að ég var í Osló í síðustu viku á námskeiði. Umfjöllunarefnið voru bæklunarskurðlækningar barna, tumorortopedi, afstýfanir og ortopedísk hjálpartæki. Stíf keyrsla frá 7:30 til kl: 18:00 þannig að ég fékk ekki mikinn tíma til að skoða Osló.

Afi Beggi og Amma Stella fóru í fyrradag. Búin að vera 2 vikur hjá okkur og held ég haft það gott. Kallinn er búinn að dytta að húsinu, m.a. lagt síðustu parkettlistana og lagað grindverk svo eitthvað sé nefnt. Hann er svo búinn að vera duglegur að ganga, ég held að kallinn hafi gengið um 20 km daglega.
Bjarki Valtýsson, doktorsnemi við Háskólann í Hróarskeldu, bókmenntafræðingur og íslenskufræðingur var í heimsókn hjá okkur í vikunni og lék sem fyrr á alls oddi. Ég man um hvað doktorsverkefnið fjallar enda vart á mannamáli.

Ómar Jr. er á leiðinni að verða stærðfræðisnillingur. Nú er Tíu-sinnum taflan að baki og samlagning og frádráttur með tölum stærri en 20 er pís of keik. Allt er þetta framkvæmt í huganum. Byrjað verður að kenna drengnum tegrun og diffrun í mars 2007.

Sindri Þór fór í fyrradag til Íslands til þess að keppa á Íslandsmeistarmótinu. Sundkvikindið er í hrikalegu formi og á pottþétt eftir að gera góða hluti. 200 flug er fyrsta grein á mótinu og ég hvet alla til þess að fylgjast með piltinum, annað hvort í lauginni eða á netinu, www.sundsamband.is

Næst á dagskránni hjá mér er að pústa lítt og ná áttum. Reyna að sinna fjölskyldunni og etv. byrja að versla jólagjafir. Ef að þú veist ekki hvað þú átt að gefa mér í jólagjöf er Canon 430 eða 580 Speelite flass efst á óskalistanum. Annars hafa kerti og spil alltaf glatt mitt litla hjarta.

Fyrir þá sem hafa komið til okkar í Fana þá hefur margt breyst frá því við fluttum. Eins og flestir vita þá höfum við nú lokið við að parkettleggja alla efri hæðina. Forljót veggfóður hafa fokið af veggjum 3 herbergja þannig að nú fer okkur að líða eins og heima hjá okkur.
Næst á dagskránni er að byggja tvöfaldan bílskúr á planinu því nóg er plássið. Bílskúrinn mun rísa næsta sumar. Öll hjálp er vel þegin, laun: flug, fæði og uppihald.

Myndir eru af skornum skammti. Ég hef ekki ennþá fundið ákjósanlega síðu þar sem ég get hlaðið stórum myndum inná án þess að það taki marga daga. Hafið þið einhver ráð?
Annars bið ég ykkur vel að lifa að sinni.

Sindri hefur nú lokið keppni í Stavanger

2006-11-12T13:33:00.000+01:00

Sundkallinn okkar er nú búinn að keppa í öllum sínum greinum á mótinu í Stavanger. Í dag voru 2 greinar hjá honum:
100 flug synti hann á 1:02,96 - bæting um tæpa sekúndu (og afi Beggi orðinn 500 Norskum krónum fátækari).
50 skrið synti hann á 27,16 - bæting um 0,2 sek.
Nánari úrslit mótsins er að finna á http://www.livetiming.no/nordsjo06

Sindri er aldeilis búinn að standa sig vel á þessu móti og lofar árangurinn góðu fyrir Íslandsmeistaramótið næstu helgi. Það verður spennandi að fylgjast með kallinum okkar þar en hann ætlar að synda 100 og 200 flug, 200 og 400 fjór, 200 skrið og 50 bak. Hann fer til Íslands á miðvikudag og ætlar að vera samferða afa Begga og ömmu Stellu sem eru búin að vera hérna hjá okkur síðustu 2 vikurnar.

Sundkallinn heldur áfram að standa sig í Stavanger

2006-11-11T12:46:00.000+01:00

Sindri var að ljúka við að keppa í 200 m. bringusundi í Stavanger. Hann synti á 2:37,16 og bætti sig um 5 og hálfa sekúndu. Hann gerði sér lítið fyrir og bætti sig líka í 50 metrunum 34,53 og 100 metrunum 1:14,28.
Við óskum honum að sjálfsögðu innilega til hamingju með góðan árangur.

Sindri Baksundsmaður

2006-11-10T20:41:00.000+01:00

Sindri sundkall er nú í Stavanger að keppa á Nordsjö mótinu. Fyrsti hluti mótsins var syntur í dag og stóð kallinn sig heldur betur. Sindri keppti í 50 metra baksundi og synti á tímanum 29,62 - bæting um 2 sek.
Hver hefði trúað því að Sindri yrði einhvern tímann góður í baksundi:)
Hann synti undir tímanum sem Ómar Þorsteinn átti þegar hann var 17 ára og er Sindri heldur betur sáttur með það.

Fríkkandi mönnum er best að lifa

2006-10-30T22:25:00.000+01:00

Já góðir hálsar, ég sé ekki betur en ég myndist alveg hreint frábærlega. Tók "vertikal hristimynd" á vélina mína og er bara nokkuð ánægður með árangurinn. Gárungar segja að ég sé að fríkka með árunum.

Getur annars einhver þarna úti gefið mér ráð varðandi myndavélina mína. Myndirnar eru svo "stórar", ca 1,5 MB og ég næ ekki að hlaða þeim inn á síðuna. Svo tekur það margar mínútur að hlaða einni mynd inn á myndaalbúmið okkar. Hvernig þjappa ég þessum myndum?

Kveðja, Ómar hinn fagri.

Grýla heitir grettin mær...

2006-10-22T00:14:00.000+02:00

Já það er ekki ofsögum sagt að börn hafi það gott á Íslandi. Fyrir utan góða leikskóla, grunnskóla, frábærar sundlaugar og fullt af alls kyns munaði að þá til viðbótar er ekki bara einn Jólasveinn á Íslandi. Nei, þeir eru þrettán og þeir gefa manni gjafir eða góðgæti í skóinn marga, marga daga. Hugsið ykkur. Það er ekki nóg að íslensk börn fái Playstation tölvur, snjóbretti, fartölvur, hesta, sjónvörp og ég veit ekki hvað í jólagjafir. Bara á Aðfangadag? Nei það gengur ekki. Þess vegna þurfa þau líka að fá gjafir 12.-23. desember. Og þrátt fyrir að maður hafi flúið land þá asnast þessir bjánar yfir holt og hæðir, vötn og firði, höf og eyjar bara til að geta sett í skóinn hjá Ásdísi Evu og Ómari Snæ í Bergen, Noregi, Skandinavíu.
Rétt áður en þessi halti kemur til byggða þarf maður að fara að hugsa hvað sé ákjósanlegast að fá í skóinn. Ég t.d. veit að Ómar Snær fékk a.m.k. 3 nærbuxur og 4 sokkapör í fyrra og sá verður þokkalega svekktur ef jólasveinarnir finna ekki upp á einhverju frumlegra í ár. Sömuleiðis held ég að Ásdísi Evu verði ekkert sérstaklega ánægð með sveinana finni þeir ekki upp á einhverju öðru en hárspennum, teygjum, nærbuxum og sokkum.
Ég vona bara að þetta komi ekki til með að valda mér magasárum, uppköstum, niðurgangi og höfuðverk. Er einhver þarna úti með góðar hugmyndir?

Á föstudaginn var "Íslenskur dagur" á leikskólanum hjá Ásdísi Evu. Þar sem ég er Íslendingur þrátt fyrir gulan lit kom það í minn hlut að fræða börnin um Ísland. Kom ég með bækur um íslenska jólasveina og Grýlu. Mér tókst að hræða öll börnin með Grýlusögum, sagði að hún æti óþekk börn og gæt alveg flogið til Noregs ef henni lysti. Það mátti heyra saumnál detta er ég sagði þeim frá því hvernig hún kyrkti óþekk börn, skæri augu og innyfli úr þeim og æti þau að lokum. Einn strákurinn fór að hágrenja og sagðist af óskiljanlegri ástæðu alls ekki vilja fara til Íslands.
Öllum börnunum fannst Grýla ljót, feit og nördaraleg og þrátt fyrir að ég reyndi að fá þau með mér með fagurskreyttum sögum um 13 jólasveina sem gæfu gotterí og gjafir í þrettán daga fyrir jól var ekkert barn sem langaði til Íslands.

Hér eru nokkrar myndir. Lifi Grýla!

Vantar gott flass!.....held ég

2006-10-21T14:31:00.000+02:00

Heisann,
Er einhver sem getur leiðbeint mér með gott flash fyrir myndavélina mína. Var að panta Zoom linsu 70-300mm (http://www.mpx.no/aspx/produkt/prdinfovnet.aspx?plid=55097 ) sem kemur í næstu viku en ég held að ég þurfi aukalega utanáliggjandi flash þar sem linsan er bara f/4-5,6. Var að spá í Canon Speedlite 430 EX. Hljómar það ekki ágætlega eða er það algjör bjánaskapur. http://www.mpx.no/aspx/produkt/prdinfovnet.aspx?plid=55085
Hvenig lýst ykkur annars á gripinn, þeas myndavélina?

Er ég klikkaður?

2006-10-09T14:36:00.000+02:00

Síðustu daga hefur Íslendingaveikin skotið upp kollinum endrum og eins. Ég er farinn að átta mig á því að ég er ekki algjörlega læknaður af sjúkdómnum. Ég er farinn að átta mig á að þetta er krónískur ólæknandi sjúkdómur sem einungis er hægt að halda niðri með vilja, þrautsegju, samtals- og atferlismeðferðum. Ég er bara ekki læknaður af kaupvilja, vinnusemi, vinnuvilja, tækja- og tólfýsn. Síðustu dagar hafa snúist um tölvu- og myndavélakaup. Þetta hefur yfirtekið huga minn algjörlega og ekki fyrsta skipti. Hef áður náð að hreinsa burt myndavélafýsnina en svo skítur hún upp kollinum aftur þegar maður á síst von á. Þetta er sko lúmskur andskoti.

Til að gera allverulega langa sögu ögn styttri þá snýst málið um það að mér er boðið að kaupa tölvu í gegnum vinnuna skattfrjálst, þ.e.a.s. hluti verðsins er dreginn af brúttó tekjum. Gott og gilt. Ég á tölvu. Ég á býsna góða tölvu sem er 3 ára gömul. Hún er með 80 GB hörðum diski og 512 Mb vinnsluminnni. Ekki DVD brennari en að öðru leyti býsna góð. Svo hef ég 17" flatskjár og Canon ljósmyndaprentara sem funkerar fínt. Ég hef í raun ekkert leitt hugann að því að fjárfesta í nýrri tölvu. Þangað til núna.
Einhvern veginn hef ég réttlætt kaup á nýrri tölvu. Og við erum ekki að tala um smátölvu, nei. Intel Core 2 Duo örgjafi, 2 GB minni, 500 GB harður diskur, 512 Mb skjákort, TV tuner, 7.1 Surround hljóðkerfi, rosa hraður DVD brennari og bara nefndu það. Keypti bassabox og fullt af hátölurum ásamt 24" tommu widescreen flatskjá. Að lokum keypti ég glæsilegan þráðlausan multifunction-ljósmyndaprentara með snerti-LCD skjá sem er líka ljósritunarvél, scanner og FAX tæki.
http://www.netheimar.com/vara_detail.asp?vara_id=287
http://h10010.www1.hp.com/wwpc/no/no/ho/WF05a/12123-12365-7361961-7361961-12715558-12715882.html
http://www.ementor.no/templates/Page.aspx?id=16477
http://www.netheimar.com/vara_detail.asp?vara_id=144

Er ég klikkaður?
Er ég illa gefinn?
Er ég sannur Íslendingur?
Er ég kannski ósköp eðlilegur?

Rök sem ég hef fundið með því að kaupa þetta drasl er:
1. Skemmtanagildi, gaman að eiga svona flotta og fína tölvu með rosalegum skjá.
2. Fæ að hafa tölvuna í friði. Krakkarnir fá gömlu tölvuna og geta leikið sér í henni. Verð því laus við endalausa "pop ups" glugga og sníkjudýr.
3. Gott verð, vaxtalaus niðurborgun á 3 árum, dregið af brúttótekjum.
4. Hægt að nota skjáinn sem sjónvarp, sleppi þar með að kaupa annað sjónvarp og DVD spilara.
5. Verðlaun fyrir að hafa unnið allt sumarfríið, 22 helgar í röð og fyrir að taka alla aukavinnu sem býðst.

Rök á móti:
1. Hef ekkert að gera með nýja tölvu, prentara, hátalara eða skjá.
2. Sindri á fartölvu, getur bara notað hana.
3. Frekar að leggja peninginn fyrir eða nota hann til einhvers annars.
4. Slæm fjárfesting.

Ég er sem sagt búinn að ganga frá pöntuninni og satt að segja sé ég ekki rassgat eftir þessu. Hlakka bara til, ég á þetta held ég skilið.

En sagan er ekki búin. Núna á eftir ætla ég að koma við í búðinni og kaupa mér nýja SLR myndavél, Canon Eos 400d. Mig hefur lengi langað í svona vél en ekki látið verða að því fyrr en núna. Munurinn á svona vél en hefðbundinni Digital vél er helst sá að myndin er tekin akkúrat þegar maður ýti á takkann þannig að krakkarnir eru ekki horfnir þegar loksins vélin tekur myndina. Myndin verður því nánast eins og maður bjóst við. Hver kannast ekki við hið gagnstæða með venjulegar digital vélar. Svo fær maður betri myndgæði og fallegri liti. Svo er það tilfinningin að taka mynd með svona vél. "It feels so good".
http://www.dpreview.com/articles/canoneos400d/page4.asp

Er ég klikkaður?
Er ég alveg að snappa?
Er ég í maníu?

Rök með því að kaupa svona vél:
1. Skemmtangildið góða. Mig bara langar.
2. Verður til þess að ég verð duglegri að taka myndir.
3. Fæ vonandi betri og fallegri myndir.
4. Góð mynd er gulls ígildi.
4. It feels so damn good.

Rök á móti:
1. Á góða digital myndavél.

Það er sama með þetta, ég sé sko ekki eftir þessu, hlakka bara endalaust til. Er það ekki það sem lífið snýst um, gleði, hamingja og tilhlökkun.
Hvern dreymir ekki um að taka góða mynd á SLR vél, skoða hana í 24" tommu widescreen skjá og prenta hana síðan út í litaprentara sem er í senn ljósritunarvél, scanner og FAX tæki!

Sundkallinn veikur

2006-10-08T15:17:00.000+02:00

Sindri var því miður orðinn lasinn í gær en synti þó sundin sín (og svaf þess á milli). Hann keppti hins vegar ekkert í dag sökum lasleika. Liðið er nú lagt af stað heim með ferjunni sem flytur þau til Bergen. Ég fer að taka á móti kallinum eldsnemma í fyrramálið og þá er bara að ná þessarri pest úr honum sem fyrst því það er annað mót hér í Bergen um næstu helgi.

Tímar gærdagsins:

50 flug 29,49 (smá bæting) 5. sæti.
200 bringa 2:46,55 (4 sek frá besta tíma) 5. sæti.
200 fjór 2:24,78 (hálf sek. frá besta tíma) 5. sæti.

Nokkrar eftirminnilegar

2006-10-06T23:53:00.000+02:00

Var að skoða gamlar myndir og rakst á nokkrar sem vöktu skemmtilegar minningar eða fengu mig til að brosa. Alltaf gaman að þessu, kíkið á HÉR.

Sindri byrjar með látum

2006-10-06T20:44:00.000+02:00

Þá er Sindri byrjaður að keppa á mótinu í Danmörku. Hann synti 2 sund í kvöld og var barasta að gera fína hluti. Árangurinn í kvöld:

100 m. fjórsund 1:07,13 (bæting um 2,5 sek) - 5. sæti.
50 m. baksund 31,35 (bæting um 1 sek) - 2. sæti.

Til hamingju Ingibjörg Ragna

2006-10-01T20:21:00.000+02:00

Jæja þá eru úrslitin ráðin í leiknum okkar. Það var Ingibjörg Ragna sem sigraði nokkuð örugglega með 13 rétt svör sem verður að teljast glæstur árangur. Til hamingju með það. Úrslitin urðu eftirfarandi.

1. Ingibjörg: 13 rétt svör
2. Maggi: 11 rétt svör
3.-4. Andrea: 10 rétt svör
3.-4. Mæja: 10 rétt svör
5. Sandra: 8 rétt svör
6. Baldur: 5 rétt svör
7. Árni Björn: 4 rétt svör

Rétt svör eru:

1. Silla hrýtur langhæst.
2. Ómar Þorsteinn hefur gælunafnið "Guli djöfullinn".
3. Sindri Þór prumpar heitri eggjafýlu (fýla dauðans!).
4. Sindri Þór teflir 30 mín skákir við páfann.
5. Ómar Þorsteinn ropar eins og 12 ára kórstelpa.
6. Ásdís Eva hefur náð að skipta um föt 18 sinnum á 5 klst.
7. Ómar Snær er langbestur í "Memory" samstæðuspilinu.
8. Ómari Þorsteini finnst kokteilssósa algjör viðbjóður.
9. Sillu finnst súrar gúrkur æði.
10. Sindri Þór getur látið staka sokka gufa upp.
11. Ásdís Eva dettur oftast út úr rúminu sínu.
12. Sindri Þór er frægur fyrir "rottugrettuna" sína.
13. Ómar Þorsteinn hefur aldrei fengið ælupest.
14. Sindri Þór dýrkar Hrein Hringsson.
15. Ásdís Eva fæddist á Selfossi.
16. Ómar Snær fæddist rangeygður.
17. Silla getur lesið/greint 14 pk letur úr 6 metra fjarlægð.
18. Ómar Snær á afmæli 19. mars.
19. Sillu finnst rautt gos horbjóður.
20. Ómar Snær er kafloðinn á bakinu.

Annars höfum við það rosalega gott núna. Frábært veður. Í dag var 20 stiga hiti og sól við fórum í góðan hjóltúr niður að firði.

Ykkur að segja náði ég bara býsna vel að slaka á þrátt fyrir hrakspár gárunga og lét ég verkfæri, garðáhöld og annað slíkt algjörlega vera um helgina.

Setti síðan inn nokkrar myndir, endilega kíkið á. Ég minni líka á að það er hægt að kommenta á myndirnar, alltaf gaman að heyra í ykkur.

Áfallalaust fyrsta ár

2006-09-27T21:41:00.000+02:00

Jæja, í dag er akkúrat 1 ár síðan við fjölskyldan fluttum til Noregs. Þetta ár hefur þotið hjá á ólöglegum hraða og við höfum m.a. ekki náð að taka upp úr öllum kössunum. Allir hafa aðlagast gríðarlega vel og það verður erfiðara en sagt að ná okkur heim aftur.
Allir eru sáttir, mun sáttari en við þorðum nokkurn tíma að vona sem er auðvitað bara frábært.

Sindri Þór heldur til Danmerkur á laugardaginn í æfingabúðir/sundmót, mikið ferðalag á drengum þessa dagana.
Ég sjálfur á hvorki meira né minna en frí þessa helgi. Þetta er fyrsta helgin frá því í lok maí sem ég á frí. Ég hef sem sagt unnið 22 helgar í röð sem ég held að sé persónulegt met hjá mér. Ég hef hér með ákveðið að reyna ekki að bæta það met. Nú er það bara að sjá hvort ég kann að vera í fríi. Hver veit nema ég klári að rífa af veggjum, legg parkett, bóni bílana og slæ garðinn, hver veit?

Hann á afmæli í dag....

2006-09-24T16:00:00.000+02:00

Hann Sindri sundkall er 15 ára í dag. Við óskum elsku kallinum innilega til hamingju með daginn og árin öll. Ég er núna að búin að baka alveg dýrindis Brownies í tilefni dagsins og erum við að fara að gæða okkur á kræsingunum. Kaka með ís og heimalagaðri heitri súkkulaðisósu klikkar ekki þegar gleðja á Sindra.

Verstu kaup nokkurn tíma

2006-09-16T23:47:00.000+02:00

Ómar Snær hefur greinilega ekki erft peningavitið mitt. Kom hlaupandi inn með þessa garnaflækju sem 8 ára stelpa í götunni seldi honum. Þetta keypti hann handa systur sinni. Eyddi sem sagt öllum vasapeningnum sínum, 70 NOK í þetta!
Vel meint en án efa verstu kaup ársins.
Gott Ómar Snær!

Fyrir þá sem telja sig geta nýtt þetta eða safna svona hlutum er þetta til sölu með 40% afslætti, 450 ISK staðgreitt og hægt er að leggja beint inn á reikninginn minn.

Læknarar

2006-09-16T23:36:00.000+02:00

Sem betur fer þarf maður sjaldan að leita sér læknishjálpar. Ég hef verið tiltölulega hraustur um ævina og hef tvisvar á minni 30 ára ævi þurft að leita læknis, þegar ég var 14 ára með slæmsku í hnénu og í sumar eins og flestir muna.
Fólk kemur með misjafnar og misalvarlegar kvartanir til læknis, allt frá því að hafa áhyggjur litlum marbletti upp í það að vera nær dauða en lífi þegar það mætir til doksa.
Læknarnir eru líka afar misjafnir, allt frá því að eiga helst að hafa takmarkað lækningaleyfi upp í það að geta næstum allt! Oft komum við orðum hræðilega að hlutunum og í okkar starfi kemur það sér afar illa svo ekki sé meira sagt. Tala nú ekki um þegar við mismælum okkur.

"Nú þarf ég að pota aðeins í rassinn á þér"
"Farðu úr að ofan, ég þarf að sjá á þér tútturnar"
"Það þarf að sónarskoða á þér kviðinn til að sjá hvort legið og blöðruhálskirtillinn sé í lagi"

Þetta er afar kvimleitt fyrir lækninn, jú stundum líka fyrir sjúklinginn sem annað hvort fer hjá sér, hlær eða kærir lækninn. En þetta er ekki það versta sem sjúklingar heyra frá lækninum sínum. Hér er topp 5 listinn yfir það sem þú vilt síst heyra frá lækninum þínum.

5. "Ég bara veit ekkert hvað er að þér".

4. "Það gera 18.400 kr".

3. "Þú er með veirusýkingu og það er ekkert sem hægt er að gera við því!"

2. "Snúðu þér við og beygðu þig fram, reyndu svo að slaka á, þetta tekur enga stund. Ég þarf að þreifa í endaþarminn á þér".

1. "Þú þarft að taka þessar töflur í fjórum sinnum á dag í þrjar vikur. Og þú mátt alls ekki drekka ofan í þær".

Sem var og verður

2006-09-14T22:37:00.000+02:00

Ég er að drepast úr hita. Mið-september og 30 stiga hiti í dag í forsælu, án gríns. Þetta gengur ekki lengur. Ég er búinn að skipta tvisvar um föt í dag í vinnunni og búinn að drekka 3 lítra af vatni, bara til að halda mér gangandi. Og hvað, jú það spáir a.m.k. 25 stiga hita a.m.k. út yfir helgina, hver þremillinn.
Annars er ég líka að leggja parkett á gestaherbergið okkar. Einnig keypti ég fínar mublur þannig að nú er þetta orðið að 5 stjörnu svítu fyrir þá sem koma og gista! Sjáið bara dómana á www.hotel.is
__________

Ásdís Eva er farin að tala norsku. Það hafðist að lokum. Nú vill hún ekki koma heim af leikskólanum. Kjempe bra!
Annars sjáum við hana nánast hækka, fötin endast í 2 mánuði og svo eru þau orðin lítil.
__________

Silla er byrjuð að vinna. Tók við þjálfun B-hópsins í Delfana. Sami bölvaði vinnutíminn nema hvað hún er í fríi laugardögum og sunnudögum nema þegar sundmót eru. Þetta er gott fyrir budduna en verra fyrir heimilslífið en kannski við bara reynum þá að nota tímann sem við höfum betur.
__________

Sindri er að fara í "klassetur" til Geilo á mánudaginn. Rafting, klettaklifur, hestbak og fleira. Það verður án efa "geðveikt". Nú er bara að krossa fingurna að hann komi óslasaður heim, ég er a.m.k. með góðar slysa og ferðatryggingar.
Hann er í hrikalegu góðu formi í sundinu og hefur nú m.a. bætt sig í þrígang í 400 skriði á æfingu, 4:34 með spyrnu, skítlétt! Það verður gaman að sjá hann á næsta móti sem verður um helgina.
__________

Ómar Snær hjólar allan daginn. Frá því hann kemur úr skólanum kl: 13:00 og þangað til að hann sofnar kl: 20:30. Og þetta eru ekki ýkjur. Gírahjól með demperum er þarnæst á innkaupalistanum fyrir kauða.
Svo var fyrsta fótboltaæfingin hjá honum í dag. Ekki alveg að gera bestu hlutina þar enda ekki í pro takkaskóm og búning. Það verður því fyrst á innkaupalistanum fyrir hann.

Góðar stundir ;)

Hetjulæknir eða djö..... skottulæknir

2006-09-03T15:59:00.000+02:00

Í mínu starfi er getur verið stutt milli hláturs og gráturs. Einn daginn ertu dáð og dýrkuð hetja og hinn daginn færðu kæru, bæði frá sjúklingi og læknafélaginu. Sem betur fer hef ég ekki lent í því síðara. Oft þarf lítið til að lækna sjúkling, oft þarf lítið til að fá mikið þakklæti frá sjúkling og ættingjum. Stundum er því öfugt farið. Þú getur staðið í 5 tíma aðgerð sem þú hélst að tækist fullkomlega en svo gengur allt á afturfótunum eftir aðgerðina. Óbærilegir verkir, sýking, oft svo slæm að það þarf að rífa allt draslið út úr sjúklingnum. Þetta er það versta sem maður lendir í.

Ég var á vaktinni í gær sem er ekki frásögu færandi nema hvað að ég varð hetjulæknir alheimsins á einni sekúndu. Sumir hafa e.t.v. heyrt um það þegar olnboginn fer úr lið hjá krökkum. Þetta er ekki beint olnbogaliðhlaup í læknisfræðilegum skilningi en nóg um það. Oftast gerist þetta þegar krakkinn leiðir foreldri, dettur og hangir ennþá í foreldrinu. Eða þá þegar foreldrar kippa krakkanum upp úr sundlauginni með því að toga í annann handlegginn. Foreldrarnir bæði finna og heyra smell, krakkinn grenjar af öllum látum og neitar að hreyfa eða nota olnbogann. Foreldrarnir halda að þeir hafi mölbrotið handlegginn á krakkanum, bruna með hann á slysó og krefjast röntgenmyndatöku, aðgerðar og helst að skurðstofuteymið verði kallað út eins og skot.
Klassísk saga og einkenni gefa manni yfirleitt greininguna og með einfaldri "aðgerð" setur maður olnbogann í liðinn nánast áður en krakkinn er kominn inn á skoðunarstofuna. Ef þetta tekst er þetta vanalega þakklátasta aðgerð af öllum aðgerðum í læknisfræði og oftar en ekki fer maður í efsta sæti á jólakortalistanum hjá viðkomandi fjölskyldunni.
Þetta gerðist einmitt í gær. Ég fékk 3 ára telpu með akkúrat klassíska sögu. Þau höfðu keyrt í 2 tíma til að koma á "stóra" sjúkrahúsið í Bergen þar sem að héraðslæknirinn hafði grunað brot og óskað eftir innlögn og etv. aðgerð. Krakkinn var að sjálfsögðu hágrenjandi, gat ekki hreyft handlegginn, móðirinn móðursjúk af áhyggjum og pabbinn við það að taka völdin, heimtaði að eitthvað yrði gert STRAX. Það var einmitt það sem ég gerði. Ég tók í handlegginn á greyið snótinni, snéri aðeins upp á hann og beygði við lítinn fögnuð hennar sem og foreldranna og ég get svarið það að ég hélt að pabbinn ætlaði að hjóla í mig á þessari stundu. En ég rétt náði að forða mér og reyndi að útskýra að nú hlyti henni að vera batnað. Það var eins og við manninn mælt, snótin hætti að skæla og byrjaði að nota handlegginn án vandkvæða. Þegar þau loksins áttuðu sig á því að ég hafði læknað stúlkuna nánast með augnaráðinu einu saman stóð þeim vart á sama. "Ertu galdralæknir?", "hvernig fórstu eiginlega að þessu?" Grátur breyttist í hlátur, reiði í gleði og ég fékk faðmlag frá mömmunni og líka frá pabbanum sem 10 sek áður var nánast búinn að gefa mér einn á´ann. Krakkinn neitaði verkjum og lék á alls oddi.
Engin röntgenmyndataka, engin innlögn, engin aðgerð, ekkert gips. Þvílíkur töfralæknir !!!

"Er þetta sárt?"

Þekkiru okkur?

2006-08-29T15:17:00.000+02:00

Ég hef ákveðið að reyna að lífga aðeins upp á síðuna. Í dag er það "Þekkiru okkur?" leikurinn. Reglurnar eru einfaldar. Þið svarið í "tölum" þar sem 1 á við Ásdísi Evu þar sem hún er yngst, 2 við Ómar Snæ og svo koll af kolli. Einfaldast er að gefa upp svarið í talnarunu t.d. 2435153412 etc. Sumar spurningarnar eru auðveldar en aðrar erfiðar, sumar svívirðilega erfiðar. Öll hjálpartæki eru leyfileg. Heimilismeðlimir í Smedsvikneset gefa engin svör.
Sá sem er með flest svör rétt er sigurvegari. Glæsileg verðlaun. Leikurinn stendur til 30.09.06.

Hver á heimilinu:
1. Hrýtur hæst?
2. Hefur gælunafnið "Guli djöfullinn"?
3. Prumpar heitri eggjafýlu?
4. Teflir 30 mín skákir við páfann?
5. Ropar eins og 12 ára kórstelpa?
6. Hefur náð að skipta um föt 18 sinnum á 5 klst?
7. Er best/bestur í "Memory" samstæðuspilinu?
8. Finnst kokteilssósa viðbjóður?
9. Finnst súrar gúrkur æði?
10. Getur látið staka sokka gufa upp?
11. Dettur oftast út úr rúminu sínu?
12. Er frægur fyrir "rottugrettuna" sína?
13. Hefur aldrei fengið ælupest?
14. Dýrkar Hrein Hringsson?
15. Fæddist á Selfossi?
16. Fæddist rangeygð/rangeygður?
17. Getur lesið/greint 14 pk letur úr 6 metra fjarlægð?
18. Á afmæli 19. mars.
19. Finnst rautt gos viðurstyggð?
20. Er loðnastur/loðnust á bakinu?

Loksins, loksins, fullt af myndum

2006-08-27T20:33:00.000+02:00

Jæja, nú loksins fékk ég græjurnar í lag og er því búinn að setja fullt af myndum inn í albúmið okkar. Endilega kíkið á.

Annars er allt gott að frétta. Það gengur rosalega vel hjá Ómari Snæ í skólanum, Ásdís Eva er að gera góða hluti í leikskólanum og Sindri Þór er kominn á fullt í æfingum.
Ég hef ekki ennþá fengið uppsagnarbréf og Silla hefur haldið bensíninu frá díselbílinum okkar. Þetta er því allt í rétta átt.

Baldur, Sasa og Co voru hjá okkur síðustu helgi og áttum við frábæra daga saman. Því miður var myndavélin mín ekki alveg í standi þá en ég á von á að fá myndir síðar sem munu að sjálfsögðu koma á síðuna.
Over´n out.

Fyrsti skóladagurinn

Heima er best

2006-08-12T22:25:00.000+02:00

Jæja, þá erum við loksins komin aftur heim til Fana. Við lentum um tvöleytið í nótt eftir langt og strangt ferðalag. Mikið var nú gott að koma heim, ég verð nú bara að segja það. En að sama skapi leiðinlegt að yfirgefa vini og vandamenn á Íslandi. Við viljum öll þakka fyrir frábærar samverustundir í sumar en því miður náðum við ekki að eyða tíma með nærri því öllum sem ætluðum.

Í dag er búið að vera alltof heitt hér í Fana, það var meira segja 25 stiga hiti í skugga nú klukkan níu í kvöld. Algjört logn þannig að mollan er rosaleg. Við neyddumst til að fara og kaupa tvö stykki viftur til þess að lifa daginn af. Tveir pakkar af frostpinnum kláruðust á 10 mínútum og bolir orðnir gegnblautir af svita. Nú liggja Norðmenn víst á bæn og biðja um kulda, regn og vind.

Annars byrjar allt fyrir á fullu í næstu viku. Ég byrja að vinna á mánudagin. Ásdís Eva byrjar á leikskóla á mánudaginn og á fimmtudaginn byrja Sindri Þór og Ómar Snær í skóla.

Nokkur gestagangur verður á næstunni því næstu helgi ætla Baldur, Svanhildur, Halla Margrét og Kári Björn að koma keyrandi alla leið frá Danmörku og eyða með okkur helginni.
Í nóvember ætlar Amma Stella að koma og vera hjá okkur í 2 vikur og ætli ég reyni ekki líka að kaupa Afa Begga hingað aftur því parkettið virðist ekki leggja sig alveg sjálft eins og ég gerði ráð fyrir.
Síðan verða það ofurjól ef svo má segja því við eigum von á 6 manns sem ætla að eyða jólunum hjá okkur. Elín María kemur, Magnús vinur hans Sindra ætlar að öllum líkindum að koma og æfa um jólin með Delfana. Síðast en alls ekki síst ætla Arnar, Inga Maja, Albert og Arnhildur að koma og upplifa norsk jól. Það verður eflaust glatt á hjalla og við hlökkum svakaleg til.

Á næstu dögum mun ég síðan reyna að koma öllum myndum síðustu 3 mánaða inn á heimasíðuna. En þangað til næst, lifið heil.

Að liggja á spítala - púl dauðans!

2006-08-05T01:18:00.000+02:00

Heyrið þið mig nú, af hverju var enginn búin að segja mér að læknar gætu líka orðið veikir. Það hefði mér aldrei dottið í heilann.

Ég varð fyrir því óláni að einhverjar illa innrættar pöddur festu sig við olnbogann á mér og skömmu síðar nánast allan vinstri handlegginn. Hann varð tvöfaldur, ég gat ekki hreyft hann og hann varð ógeðslegur á litinn.
Eftir að hafa verið með 40 stiga hita á vaktinni, með hroll og köldu, illa áttaður með óráði var mér skipað að leggjast inn á spítala. Eftir að hafa náð að malda 2-3x í móinn tókst mér ekki að halda aftur að snarbrjáluðum hjúkrunarfræðingum þannig að innlögn var eigi umflúin.

Ég lagðist sem sagt inn á Sjúkrahús Suðurlands vegna sýkingar í handlegg. Læknirinn á vaktinni var ég og ég varð því að skoða mig vel og gaumgæfilega. Ég tók greinagóða sjúkrasögu af mér, spurði sjálfan mig ýmissa skringilegra spurninga sem mér fannst eiginlega ekki koma þessum veikindum mínum við. Síðan ordineraði ég lyfjum á mig og bað hjúkrunarfræðingana að setja upp æðalegg hjá mér til að koma lyfjunum inn í lífsæðarnar hjá mér. Eftir 18 tilraunir spurði ég hvort ekki væri hægt að fá lækni til að setja þessa andskotans nál upp. Jújú, ekkert mál. En læknirinn á vaktinni var ég! Ég setti því á mig stasann og skellti einni nál upp hjá mér sjálfur í fyrstu tilraun, geri aðrir betur. Síðan tengdi ég vökvann hjá mér og óskaði mér góðs bata.
Ég lá inni sex sólarhringa. Sex sólarhringum of lengi.

Fyrir utan að veita fjölþætta læknisþjónustu, gefa lyf, rassamæla, þvo að neðan og reyna að halda líftórunni í manni myndi maður ætla að sjúkrahúsvist ætti sömuleiðis að stuðla að hvíld . Þannig gæti líkami og sál gæti fengið frið til þess að eflast og endurnærast. Hvíldin ætti að auki að auðvelda það að meðferð skilaði áætluðum árangri.
Ég komst hins vegar að því að það að liggja inni á spítala er sko full vinna. Ég fékk ekki einu sinni frið á næturna fyrir rassamælingum og ég sá bara björgunarhringinn á mér belgjast út af öllu þessu áti.

Kl 6:00 - Rassamæling, blóðþrýstingsmæling
K: 6:05 - Setja upp lyf, tengja nál
Kl: 6:05 - Ná í mælinn
Kl: 6:40 - Aftengja lyfið, loka nálinni
Kl: 8:00 - Blóðprufa
Kl: 8:30 - Neðanþvottur
Kl: 9:00 - Morgunmatur
Kl: 9:45 - Matarbakkinn tekinn
Kl: 10:00 - Skipt um lak
Kl: 11:30 - Hádegismatur
Kl: 12:00 - Setja upp lyf, tengja nál
Kl: 12:30 - Matarbakkinn tekinn
Kl: 12:45 - Aftengja lyfið, loka nálinni
Kl: 14:00 - Rassamæling
Kl: 14:05 - Setja upp lyf, tengja nál
Kl: 14:45 - Aftengja lyfið, loka nálinni
Kl: 15:00 - Kaffi og brauð
Kl: 15:30 - Kaffibakkinn tekinn
Kl: 16:00 - Ný nál sett í handlegginn
Kl: 17:30 - Kvöldmatur
Kl: 18:00 - Setja upp lyf, tengja nál
Kl: 18:15 - Matarbakkinn tekinn
Kl: 18:45 - Aftengja lyfið, loka nálinni
Kl: 20:00 - Kvöldkaffi
Kl: 20:30 - Kvöldkaffisbakkinn tekinn
Kl: 21:00 - Rassamæling
Kl: 22:00 - Setja lyf upp, tengja nál
Kl: 22:45 - Aftengja lyfið, loka nálinni
Kl: 24:00 - Setja lyf upp, tengja nál
Kl: 00:45 - Aftengja lyfið, loka nálinni
Kl: 02:00 - Tvær parkódín
Kl: 04:00 - Reglulegt innlit
Kl: 06:00 - Rassamæling...........

Eins og þið sjáið er þetta þokkalegt áreiti og ekki fyrir gulan mann að standa í svona geimi langt fram á nótt í alvarlegum veikindum. Ég var því frelsinu feginn en ég er ennþá að jafna mig. Ekki eftir veikindin, heldur eftir taumlaust át, svefnlausar nætur, harðhenta neðanþvotta og gyllinæðarvaldandi rassamælingar!

Auglýsingar sem fara virkilega í taugarnar á mér!

2006-08-05T00:14:00.000+02:00

Norðmönnun er margt annað til lista lagt en að ganga á fjöll. Þeir framleiða ótrúlega skemmtilegar auglýsingar. Svo skemmtilegar að manni finnst það bara skemmtileg tilbreyting þegar auglýsingar skella á í miðjum þætti eða í miðri spennumynd. Norskar auglýsingar eru nefnilega ansi vel gerðar og fyndnar.

Ég er búinn að vera hér á Íslandi í 8 vikur. Ég viðurkenni það fúslega að ég er hvorki þolinmóðasti né umburðarlyndasti ættleiddi karlmaðurinn á jarðríki. Vegna aðstæðna hef ég horft á sjónvarpið mest megnis af tímanum sem ég er ekki að vinna eða með fjölskyldunni. Ég hef bara RÚV og SKJÁ 1. Þar eru sýndar 3 auglýsingar fara ótrúlega í taugarnar á mér, mismikið þó. Þegar þær birtast þá finn ég hvernig reiðin, hatrið og ofbeldishneigðin brýst um í brjósti mér og ég finn hvernig svitinn sprettur fram á enninu á mér. Hnúarnir hvítna og ég bít tönnunum það fast saman að æðarnar í augunum á mér eru við það að springa. Þessar auglýsingar eru spilaðar svo oft að ég er farinn að missa táneglurnar á þriðju, fjórðu og fimmtu tá á báðum fótum.

KFC
Ekki minnast á þessar auglýsingar. Sem betur fer er sköllótti kallinn hættur að birtast á skjánum, "Kjúklingaborgari, fljótlegur og góður". Hvað er svona fljótlegt við kjúklingaborgara, ég bara spyr!
Og svo eru það allar hinar ömurlegu auglýsingarnar. Þetta eru bara svoooooo klénar auglýsingar að ég er hættur að kaupa mér KFC og mér verður hreinlega flökurt við að sjá skiltið. Gott þeir!!!

Pepsi Max
"Don´t worry, there´s no sugar". Arrrggggg!. Flugvélaauglýsingin og lögguauglýsingin eru mjög leiðinlegar auglýsingar sem ég bara þoli ekki. Maður hefði nú haldið að Pepsi gætu nú gert auglýsingar með aðeins meira skemmtanagildi í. Vá maður!

VISA
Á hún ekki að hafa neinn farangur?
Hvað á að gera við bílinn, skilja hann eftir fyrir utan innganginn?

Ég tel að auglýsingar eigi að hafa eitthvað skemmtanagildi eða þá fá mann einhvern veginn til að langa í eða fjárfesta í tiltekinni vöru. Þessar þrjár gerðu það ekki.
Inn á KFC fer ég aldrei aftur, ég drekk bara CokaCola light og ég er búinn að skipta úr VISA yfir í MasterCard. Góðar stundir.

Af Hnökkum og Imprezum

2006-07-21T19:17:00.000+02:00

Hin meinta þjóðsaga um Hnakka og Imprezur með spoiler er ekki þjóðsaga. Þetta er blákaldur veruleiki.
Hér á Selfossi sér maður bíla í algjörum sérflokki. Nú er ég búinn að sjá fullt af Subaru Imprezum með gígantískum spoilerum og álfelgum dauðans. En getur einhver sagt mér hvað er málið með að fá sér gráa Toyotu Avensis 1.6 árg. ´98 og troða Low Profile sportdekkjum á 19" álfelgum undir beygluna og lækka síðan bílinn um 4 cm?
Eða setja svartar rúður í Skoda Favoritt árg. ´92 og mála eldglæringar á brettið?
Þetta er eitthvað sem ég skil ekki.
Þegar ég keypti mér fyrsta bílinn minn, Toyotu Corollu árg. ´88 Hatchback datt mér ekki í hug að eyða 400 þús. í að setja Low Profile dekk og álfelgur undir skrjóðinn, setja filmur í rúðurnar, flækjur eða tölvukubb í vélina eða þá fylla skottið með bassakeilum. Mér fannst eiginlega bara einfaldara að kaupa mér ögn nýrri og sportlegri bíl.
Og af hverju Subaru Impreza? Af hverju ekki Volvo S50, VW Jetta, Toyota Corolla eða Nissan Primera?
Það er auðvitað alltaf klassískt að eiga flottan sportbíl og þá er ég að tala um alvöru sportbíl, ekki Subaru. Subaru er ekki sportbíll. Hins vegar eru Mercedes og BMW klassíkerar sem klikka ekki. Hver man ekki eftir gömlu BMW-unum á krómfelgunum með kögrinu í afturglugganum. Forljótt en maður sætti sig einhvern veginn við það. En Subaru Impreza, kommon!!!

Svo eru það Hnakkarnir. Þeir eru til, alveg satt. Þeir eru í stórum dráttum ekkert mjög ólíkir mannfólkinu. Þeir auðvitað klæða sig fáranlega og tala mál sem ég amk ekki skil. Flestir eiga Imprezu, eiga alla diskana með Skítamóral og nánast allir eru með "Highlights" (sem mér skilst að séu strípur).

Ég sá einn Hnakka í sundi áðan. Ég þekkti hann strax, týpískur Hnakki.
Þegar ég var að koma slátrinu fyrir í nærfötunum sé ég að Hnakkinn stendur við hliðina á mér, ljósabrúnn, sætur og auðvitað með "Highlights". Hann lítur síðan spyrjandi á mig og spyr: "Áttir þú ekki ljósbláa Imprezu?"!!!!!

Tveir týpískir Hnakkar á góðri stundu.

Strangar æfingar að skila sér

2006-07-12T19:01:00.000+02:00

Nú er ég búinn að vinna hér á Selfossi frá því 12. júní. Ég hef sjaldan eða aldrei verið í betra vinnuformi. Ég er búinn að taka 6 vaktir á síðustu 11 dögum á Heilbrigðisstofnun Suðurlands, þar af 4 framvaktir og 2 gæsluvaktir. Auk þess er ég á krónískri bakvakt á Hjúkrunarheimilinu Ási í Hveragerði.
Þetta er nánast við mitt besta. Einungis páskarnir 2001 og júlí 2005 slá þessu við. Ef við miðum við að ég hef ekkert verið að æfa í Íslenska heilbrigðiskerfinu síðan í ágúst 2005 þá er þetta ótrúlegur árangur.
Ég hef helst verið að einbeita mér að framvöktum og staðarvöktum en einnig tekið eina og eina bakvakt. Ég er að bæta tæknina gríðarlega og hef m.a. náð að skoða fjögur slitgigtarhné á 1:26;21 mín. sem er einungis 1;46 sek. frá Evrópumetinu sem sett var í Köln af þýska bæklunarskurðlækninum Friedrich Glanz árið 1993.

Það er augljóst að æfingarnar í Noregi og strið síðustu ára eru að skila sér. Ég er í stöðugum framförum og sem betur fer hafa meiðsli ekki verið að hrjá mig. Nú stefni ég á að ná lágmörkum á Heimsmeistaramótið í vörtufrystingum sem fram fer í október á næsta ári en til þess þarf ég að frysta 40 vörtur í einni vitjun. Þetta er gríðarlega sterkt mót þar sem allir bestu læknar heimsins eru samankomnir. Í nóvember í ár er svo Norðurlandamót símatíma og þar stefni ég klárlega á verðlaun.
Vottorðaleikarnir eru svo í janúar 2007 og í apríl sama ár hefst riðlakeppni blöðruhálskirtilsþreifinga. Síðan stefni ég á það að taka þátt í Ólympíuleikum Skottulækna í fyrsta skipti árið 2008 en það mót verður haldið í Póllandi. Það er því margt á dagskránni og ég er staðráðinn í að æfa þrotlaust og standa mig. Æfingabúðunum hér á Íslandi lýkur 10. ágúst og þá hefjast langar og strangar æfingar í Noregi.

Ég vil sérstaklega þakka Sillu, konunni minni þann gríðarlega stuðning sem hún hefur veitt mér í þessu þrotlausu æfingum og án hennar væri þetta ekki mögulegt. Sömuleiðis hafa börnin mín sýnt mér gríðarlega skilning. Takk öll.

Silla, má ég kaupa mér Plasmasjónvarp?

2006-06-29T22:48:00.000+02:00

Ein ástæðan fyrir því að mér hefur liðið vel í Bergen er að það er andrúmsloftið afslappað. Lífið gengur hægar, maður missir ekki af sjálfum sér og fjölskyldunni og það að vera heima og slappa af er ekki merkingarlaus breyta. Mér hefur nánast liðið eins í fríi þessa 9 mánuði sem ég hef búið þar. Ég hef lært að nota peningana betur, ég hef lært að forgangsraða hlutum og veraldleg gæði skipta mig minna máli.
Það skiptir ekki máli fyrir nágrannann eða vinnufélagana hvernig bíl ég á, hvort ég eigi 300 þús króna gaseldavél, hvort ég eigi 12 feta fellihýsi, 250 þús króna DSLR myndavél, kaupi bara föt frá þekktum hönnuðum eða hvað ég borga í skatt.
Þeim er bara drullusama!!!

Ég læknaðist af hinni landlægu íslensku sótt, "égverðaaðkaupaþettaþvívinurminnásvonaogéggetekkiveriðminnimaðuralvegsamaþóégþurfiaðtakalánfyrirþví".

Þegar ég kom til Íslands varð ég lasinn aftur. Ég hlýt að hafa smitast úðasmiti í flugvélinni því það fyrsta sem ég gerði var að biðja um Saga Boutique bæklinginn. Ég byrjaði að skoða dýra ónauðsynlega hluti og keypti meira að segja rándýran ostaskera sem ég veit ekki hvað ég á að gera við. Þegar ég kom í Leifstöð var ég orðinn tekinn, ég staulaðist í raftækjahillurnar og setti eitt stykki iPOD nano í innkaupakörfuna en sem betur fer neitaði kortið mér þannig að ég fór bara út með sælgæti sem ég á aldrei eftir að éta. Þegar til Akureyrar var komið var ég orðinn það veikur að ég gekk inn í Toyota umboðið og keypti mér eitt stykki Toyota Avensis!!!
Þrátt fyrir að hafa einungis verið hér á landi í 19 daga hef ég að auki íhugað að kaupa og skoðað ný tískugleraugu, rándýra myndavél, nýja skó, flatskjásjónvarp, ferðatölvu og nýjan GSM síma.
Það eina sem hefur staðið í veginum er að ég hef unnið svo mikið að ég hef ekki komist í bankann til að taka lán, sem betur fer.

Nú er ég hins vegar á batavegi. Ónæmiskerfið mitt hefur styrkst svo mikið í Noregi að ég hef sjálfur náð að vinna á þessum mjög svo skæða sjúkdómi. Ég fór meira segja út í búð og keypti mér skyr, epli og banana til að snæða til kvöldverðar í staðinn fyrir að setjast inn á bar og fá mér bjór og Pizzu. Svo fór ég í langan göngutúr með bakpoka á bakinu.

Ég fékk bráðasjúkdóminn. Flestir Íslendingar hafa þó krónísku gerðina af sjúkdóminum og flestir á alvarlegu stigi. Stressið og kaupæðið hefur aukist gríðarlega og er ég sannfærður að algengi sjúkdómsins nái yfir 50%. Nýgengi sjúkdómsins fer hækkandi og einungis kverkaskítur og niðurgangur slær sjúkdómnum við hvað varðar algengi og nýgengi.

Hér á Selfossi eru helstu umræðuefnin laun og aftur laun, húsnæðiskaup og hafa 5 af 8 læknum nýlega keypt sér nýja bíla. Umferðin hér á Íslandi er með því móti að maður ætti að líftryggja sig áður en haldið er út að aka, því flestir eru hreinlega "úti að aka" og nánast allir of hratt. Framúrakstur við hættulegar aðstæður er greinilega þrálátt einkenni sjúkdómsins þegar hann er kominn á sitt síðasta stig. Ég þarf ekki að minnast á kaupæði, lántökur og stress. Þunglyndi og kvíðaraskanir er algengur fylgikvilli og hægðatregða, munnþurrkur og hroki oftar en ekki til staðar. Bólgueyðandi lyf eins og Voltaren Rapid og Ibufen vinna engan veginn á verðbólgunni og vaxtavöxtinn er ekki hægt að stoppa með hormónalyfjum.

Það versta við sjúkdóminn er að hann greinist oft seint, fólk finnur seint fyrir einkennum og telur sig jafnvel algjörlega frískt. Sjúkdómurinn smitast líka blóðleiðina gegnum fylgju frá móður til barns og í þeim tilfellum er sjúkdómurinn nánast ólæknanlegur.
Ég vona svo sannarlega að stjórnvöld veiti fé til rannsókna á sjúkdóminum til þess að bæta greiningu, meðferð og horfur því með þessu áframhaldi heyra orð eins og súrir hrútspungar, siginn fiskur, selspik, afslöppun, nægjusemi og ró sögunni til.

Kominn til Íslands

2006-06-11T20:26:00.000+02:00

Jæja, í gærnótt lenti ég í Keflavík. Hélt síðan upp á Selfoss þar sem ég byrja að vinna á morgun en síðan fór ég upp á Skaga og skemmti mér hrikalega í rosalegasta brúðkaupi sem ég hef verið í. Þynnkunni eyddi ég svo í að slátra eldhúsinnréttingu og veggjum.
Ég verð nú bara að segja að ég er strax farinn að sakna Fana.
Sakna trjánna, vatnanna, hjólastíganna og fuglasöngsins. Í dag var 27 stiga hiti í Fana, logn og heiðskírt. Krakkarnir voru á sundskýlunni í allan dag og Sindri, Gunnar, Simen og fleiri fóru niður á strönd rétt hjá okkur og stukku í sjóinn af stökkbrettum sem byggð eru út frá klettunum, hreint og beint magnað.
Hér uppi á Skaga er rigning og 12 stiga hiti og engin tré.

Ég fer síðan til Akureyrar á miðvikudaginn og við tekur endalaust djamm með MA félögum.
Silla og co koma til Íslands á sunnudaginn og eyða líklega fyrstu dögunum í sumarbústað með mömmu og pabba á suðurlandinu.

Ég reikna síðan með því að "Lífið í Fana" fari í sumarfrí til 11. ágúst. Gleðilegt sumar og vonandi sjáum við ykkur flest.

Travelt, ójá!!

2006-06-02T00:50:00.000+02:00

Maður hefur ekki haft tíma til að pikka inn færslur síðustu daga. Í fyrsta lagi hefur verið gríðarlega mikið að gera í vinnunni hjá mér og í öðru lagi stöndum við í að taka efri hæðina í gegn.
Nú erum við búin með 2 herbergi, þ.e.a.s. að rífa veggfóður af, leggja glassfíber og mála svo og leggja parkett. Afi Beggi kom í dag til þess að aðstoða okkur, indælt af honum. Elsie og Gunni Geimvarta komu svo í nótt og ætla að vera í rúmar tvær vikur. Elsie ætlar að ganga um alla Bergen sem og úthverfin og Gunnar ætlar að sýna Norðmönnum hvernig á að synda.

Gott Silla (1)
Jú, það má nú segja. Elskuleg Silla mín gerði okkur þann greiða að fylla bílinn okkar af bensíni. Oftast er það bara gott mál en ekki þegar um er að ræða Dísel bíl!!!
Sem sagt, bíllinn sat fastur yfir helgi og síðan var það víst mega maus að komast að tanknum og tæm´ann. Rúmlega 30 þús ISK takk fyrir!!!

Gott Silla (2)
Loksins þegar við vorum búin að fá bílinn af verkstæðinu var Silla svo heppinn að vera tekin á of háum aksturshraða, 92 km/klst. Aðrar 30 þús ISK takk fyrir!!!
Hins vegar getur maður allt eins sagt "GOTT NORÐMENN". Málið er að hún var stödd á s.k. motorvei. Þar eru engin skilti sem segja hversu hratt þú mátt aka, bara að þú mátt aka hraðar en 60 km/klst. Þ.e.a.s. svo hvítt skilti með yfirstrikuðu 60. Við töldum líklegt að leyfilegur hámarkshraða þarna væri 90 km/klst því ef þú ekur hægar veldur afar miklu öngþveiti. Neinei, það stekkur svo bara lögga nánast fyrir bílinn hjá Sillu, sko milli bíla og bendir eins og asni. Brjálaðist hann svo því að hún bara snarhemlaði ekki, heldur tók 10 metra í að koma sér út í kant. Neinei, þá er leyfilegur hámarkshrað 80 km/klst.
Þetta átti hún svo bara að vita, að á Vestlandinu væri hámarkshraðinn 80 km/klst ólíkt á Austlandinu!!! Gott þeir!!!
Og svo er það eitt enn, það voru bara nokkrir metrar milli bíla, svo mæla þeir hraðann á allri umferðinni og pikka svo bara bíla handahófskennt. Er þetta leyfilegt?

Gott Silla (3)
... því hún keyrða að öllum líkindum á nagla/glerbrot í dag. A.m.k. er sprungið á framhjólinu á bílnum hennar.

Nú bíð ég bara eftir að við tjónum annan bílinn.

Nú fer að líða að heimkomu, heimakomu hefur ég hins vegar aldrei fengið. Einungis rúm vika í að ég stígi fæti á Frón. Fyrst á dagskrá er að spila golf því ég tími ekki að borga 200 þús til að spila hér!!!

Að lokum eru hér myndi af því sem ég gerði í gær. Myndirnar tala sínu máli. Önnur myndin er að mjaðmabroti sem hefur verið fest og hin af hefðbundnu ökklabroti. Lifið heil.

Fullt að gerast

2006-05-20T23:57:00.000+02:00

Já það er óhætt að segja að við sitjum ekki auðum höndum þessa dagana. Elín María kom í heimsókn s.l. mánudag og verður til 30. maí. Þann 31. maí koma svo Elsie og Gunnar og ætla þau að vera í 2 1/2 hálfa viku. Afi Beggi kemur svo 1.-5. júní og ætlar hann að hjálpa okkur að leggja nýtt parkett á efri hæðina og setja upp garðskúr. Sem sagt gestagangur þangað við komum til Íslands. Ég kem 9. júní og hinir 18. júní. Ég mun eiga 10 ára stúdentsafmæli sem halda skal uppá í 3 daga. Svo mun ég reyna að gera heilbrigðislegt gagn á Selfossi í sumar.

En eins og er vorum við að klára að rífa veggfóðrið af barnaherberginu, líma glassfiber á, kítta og mála. Á mánudaginn mun parkettið leggjast þar á. Vona svo bara að herbergið fái góðan bata eftir aðgerðina. Svo er Sindra herbergi og þvínæst okkar svefnherbergi. Leikherbergið og gestaherbergið eru á biðlista en munu leggjast undir hnífinn eins fljótt og kostur gefst á.

Annars óskum við Afa Begga til hamingju með daginn sem og Finnum til hamingju með Evróvision. Minni jafnframt á að ég var að setja nokkrar nýjar myndir inn í albúmið okkar.
Lifið heil.

Kominn í pakkann

2006-05-14T22:44:00.000+02:00

Mér finnst það ekki ýkja langt síðan að ég var ungur háskólanemi að byrja í námi. Einhleypur og barnlaus. Helgarnar fóru oftar en ekki í skemmtanalífið og "strákana" og fast samband, börn, kaffistell og göngutúrar voru fjarlægir hlutir.
En á nokkrum árum hefur lífið tekið afar bratta stefnu upp á við. Hlutir sem mig óraði ekki fyrir að ég ætti eftir að gera, spá í eða eignast hafa dúkkað upp á yfirborðið hægri vinstri. Það er eitt að eignast kærustu og kannski eitt barn en kona og 4 börn, það er algjör ofsi. Já, ég man þegar ég eignaðist Ómar Snæ og Ásdísi Evu, þá taldi maður sig vera kominn í "pakkann". Nú sé ég að það var þokkalegur misskilningur. Þegar ég stóð áðan úti í garði og sló í kringum beðin með sláttuorfinu sem ég var að kaupa áttaði ég mig á því að núna fyrst var ég kominn í hinn eiginlega pakka.

Auk þess hef ég á síðustu mánuðum:
Keypt mér einbýlishús í barnvænlegu hverfi.
Keypt mér 2 sparneytna fjölskyldubíla.
Farið í göngutúr.
Keypt mér sláttuvél og sláttuorf.
Unnið í garðinum.
Keypt mér ýmis verkfæri, m.a. sög, réttskeið, þvingu, stunguspaða og 25 m framlengingarsnúru.
Keypt mér matar- og kaffistell.
Spáð í gardínur.
Sett húsreglur.
Setið foreldrafund.
Keypt eins skó og jakka og konan.

Og ennfremur er á leiðinni að:
Helluleggja bílaplanið.
Leggja parkett á efri hæðina.
Fá tengdapabba í heimsókn til að hjálpa mér í húsinu.
Þökuleggja.
Sitja fleiri foreldrafundi.

Já, það er greinilegt að ég er kominn í "pakkann". Og það er bara miklu skemmtilegra en mig óraði fyrir!

Of gott veður

2006-05-09T14:20:00.000+02:00

Já því miður höfum við ekki verið dugleg að skrifa síðustu daga, hvorki pistla né sett myndir inn frá því í apríl. Skýringin er sú að það hefur hreinlega viðrað á okkur slíkt að það hefur hvorki gefist tími né vilji til að sitja inni og káfa á lyklaborðinu.
Síðustu viku hefur hitastigið rokkað á bilinu 22-26 gráður, ekki sést ský á himni og við höfum þakkað Guði fyrir þann litla andvara sem hann hefur gefið oss því annars værum við dauð!
Við höfum að mestu haldið okkur úti á palli ásamt því að fara í göngutúra og hjólatúra. T.a.m. í gær hjóluðum við Ásdís Eva niður í bæ og "kósuðum" okkur við iðandi mannlíf, fuglasöng, gosbrunna, nýútsprungna túlipana og glampandi sól.
Ómar Jr og Silla hittu okkur síðan og létum við fara vel um okkur á kaffihúsi, úti að sjálfsögðu.
Þetta er hreinlega eins og að vera í útlöndum!!!

Við fáum ekki börnin inn á kvöldin, þau leika sér úti til miðnættis, við nennum ekki að gera handtak inni, sleikjum bara sólina, tæmum sólarkremstúbur, þömbum bjór og étum ís.

Æi, skítt með það.

Eins gott að hún var allsber!

2006-05-01T22:40:00.000+02:00

Þetta er bara ósköp venjulegt klósett. Allir vita til hvers klósett eru. Maður er ekki mikið að stunda það að vaða klósett. Smábörn geta vissulega dottið ofan í en það er annað mál. Ásdísi Evu tókst hins vegar að framkvæma atriði sem einna helst á heima í "Jackass" eða "Strákunum". Ásdís Eva hefur þann einkennilega sið að klæða sig úr öllum fötunum þegar hún k****. Ekki spyrja mig af hverju, kannski til að vera við öllu búin ef hún skyldi nú detta ofan í klósettið, hver veit? En ókey, hún sat sem sagt í góðum fíling á klósettinu og var að pissa og k***, ekkert mál. En þegar hún var búin fór hún að klifra, steig upp, stóð á setunni klofvega yfir klósettinu og rann síðan og endaði ofan í klósettinu. Þarna stóð hún í eigin saur og hlandi upp að hnjám, ekki í alveg eins góðum fíling og áður.
Gott Ásdís Eva!!!

En hvað fær fólk til þess að klifra á klósetti?
Og hvað fær fólk til þess að klifra óskeint á klósetti?
Eins gott að hún var allsber!

"Nei, nei þetta var ekkert vont. Bara pínu þegar pabbi skrúbbaði mig með vírbustanum og sprittþvoði mér eftir á, en annars allt í gúddí fíling. Ég mæli eindregið með að k*** allsber, gerir gæfumuninn."

Í sól og sumaryl

2006-04-28T23:18:00.000+02:00

Skattaskýrslan
Jæja, mér tókst hið ómögulega. Ja kannski ekki, allavega tókst mér það sem ég hélt að yrði mér ómögulegt. Ég fyllti norsku skattskýrsluna út og skilaði henni rafrænt. Nei, ég er ekki að gantast, þetta er satt, mér tókst þetta.
Í því tilefni hef ég ákveðið að halda heljarinnar partý. Býð ég öllum úr sveitinni, langömmu heillinni, það mun verða veislunni margt í.

Ef ég væri einstæð móðir með 2 börn
... fengi ég rúma milljón til baka frá skattinum.
...eehh, ekkert svo sem meira að segja um það.

Kortaæði, kortaflæði
Fyrir þá sem eru kortsjúkir gæti Noregur verið góður staður til að búa á. Norðmenn bjóða nefnilega uppá að maður geti verið með úttroðið veski af kortum. Kannski 30-40 stykki þakka þér fyrir!!! Ég til dæmis er kominn með 24 kort. Bíókort, matarbúðarkort, strætókort, flugkort, bensínkort, díselkort, leirtauskort, nammikort, sundkort, nokkur debetkort og kreditkort ásamt hinum og þessu afsláttar- og bónuskortum. ´
Bölvað rugl!!! Já kannski, mér dugar líklega helmingurinn af þessum kortum. En samt verður það ekki af Norðmönnum tekið að þeir kunna að gefa afslætti og útbúa góð "kúnnakort" ólíkt íslendingum. E-kortið, Esso kortið, Orkukortið og hvað öll þessi kort nú heita eru bara prump miðað við norsku kortin. Hér er sko ekkert 0.01% tilbaka eða eitt af hverjum 300 frítt heldur erum við að tala um 10-40% afslátt. Bensínkortið t.a.m. gefur mér 14% afslátt af bensíni, ég fæ 35% afslátt af bíómiðum og 3ja hvert popp og kók frítt. Allt þetta getur talið þegar á hólminn á komið þó það felist þó nokkur vinna í að muna hvað kort maður á að nota í hinni og þessari búðinni.

Sumarið er komið
Já það má með sanni segja að sumarið sé komið. Heiðríkja, 16 stiga hiti og logn. Getur ekki verið betra. Við fórum í Plantasjen í dag og versluðum garðblóm, 200 lítra af mold, blómapotta, garðáhöld og áburð. Garðdagur fjölskyldunnar verður síðan 1.maí. Þá verður garðurinn tekinn með trompi. Það verður góðu upphitun fyrir næsta sumar en þá er stefnan tekin á að helluleggja hálft bílaplanið og setja upp lýsingu, byggja bílskúr, þökuleggja og ............

Elskað, dáð og dýrkað

2006-04-25T20:35:00.003+02:00

Eins og ég minntist á áður er sumt sem maður bara þolir ekki og gerði nánast hvað sem er til að losna við það. En sem betur fer eru líka til hlutir sem maður hreinlega elskar, langar ótrúlega mikið í eða getur ekki verið án. Eins og það er nú á hreinu hvað heimilisfólk hér á bæ þolir ekki þá er það líka nokkurn veginn á hreinu hvað við elskum og dýrkum. Fyrir sumt gæfi maður nánast hvað sem er eða gerði hvað sem er til að eignast, fá eða halda í það.

Sindri Þór:
1) Sælgæti
2) Ís
3) PsP

Ómar Snær:
1) McDonalds
2) Gel
3) Takkaskór

Sigurlin Þóra:
1) Kattleysi
2) Hárblásari
3) Varasalvi

Ásdís Eva:
1) Glimmer, gull og skart
2) Amma Dísa
3) Raven

Ómar Þorsteinn:
1) Hvítlaukur
2) Sjálfgengjandi skrúfur
3) Álagningarseðill í plús

Silfurrefurinn hefur lokið keppni

2006-04-23T22:57:00.000+02:00

Þá er mótinu í Luxemborg lokið og Sindri silfurkall kemur heim á morgun.
Í gær synti hann 100 m. flugsund og komst í úrslit. Hann varð í 7. sæti í úrslitunum, synti á 1:06,57 og bætti sig um rúma sekúndu.
Í dag synti hann svo 400 m. fjórsund á 5:22,77 og varð í 13. sæti (opinn flokkur 20 ára og yngri). Þetta var nokkuð frá hans besta tíma en kallinn má nú vera ánægður með afraksturinn á mótinu og silfrið í farteskinu.
Við óskum honum að sjálfsögðu innilega til hamingju með glæsilegan árangur og hlökkum til að fá hann heim.

Sindri með silfur í LUX

2006-04-21T23:40:00.000+02:00

Núna um helgina er Sindri sundkall að keppa á alþjóðlegu unglingamóti í Luxemborg með íslenska unglingalandsliðinu. Við erum nú ekki mikið búin að sjá af kallinum síðustu 2 vikur þar sem hann var í æfingabúðum í Nørresundsby í Danmörku í síðustu viku. Kallinn kom heim í 3 daga og hélt svo til Luxemborgar í gær.
Sindri byrjaði mótið af krafti og landaði silfurverðlaunum fyrir Ísland í 200 metra flugsundi. Hann synti á tímanum 2:22,56 og bætti sig um nærri 5 sek. Kallinn synti svo 3 aðrar greinar í dag, 200 fjór, 50 skrið og 50 flug.
200 fjór 2:32,90, 7. sæti og bæting um hálfa sek. í 50 m. laug (en á að geta gert betur)
50 skrið 28,44, bæting um tæpa sekúndu.
50 flug 29,90, smá bæting á fyrri tíma.

Á morgun á hann að synda 100 flug og svo 400 fjór á sunnudag. Við sendum honum auka orku og fallegar hugsanir héðan frá Fana. Áfram Ísland!!!
Við ætlum að halda áfram að koma með fréttir frá LUX um helgina en hægt er að skoða úrslit frá mótinu hér.

Óþolandi

2006-04-19T16:37:00.000+02:00

Er eitthvað sem þú þolir ekki eða fer alveg hreint og beint í taugarnar á þér?
Er eitthvað sem þú þolir svo lítið að þú myndir gera nánast allt til þess að losna við það?
Oft er það nú þannig að maður "þolir ekki" eitthvað en getur lifað með því. Já, og svo er það nú oft þannig að maður getur séð einhverjar ljósar hliðar á málinu. Ég þoli t.d. illa þegar einhver gleymir að skrúfa tappann á gosflöskunna eða gleymir að setja hana inn í ísskáp.
En ég get lifað með því. Sömuleiðis finnst mér það afar leiðinlegt að sitja fastur í 200 bíla röð á leið heim úr vinnunni. Ljósa hliðin á því er þó sú að þá get ég notað tímann til á láta hugann reika, hugsa um málverk, grillmat, varðveislu ósonlagsins, rifjað upp gamla þætti spaugstofunnar o.s.frv.
En sumt getur maður ekki lifað með og þolir hreint og beint ekki. Maður myndi gera allt til þess að fá þessa hluti úr tilverunni, fórna jafnvel lífi sínu og annarra.
Hér á okkar heimili fer það ekki á milli mála hvað heimilisfólkið þolir ekki.

Ásdís Eva:
1) Ljósar flauelsbuxur
2) Að bíða
3) Grýla

Sigurlín Þóra:
1) Kettir
2) Gullfiskar
3) McDonalds Dót

Ómar Snær:
1) Inniskór
2) Blóð
3) Rassahitamælar

Sindri Þór:
1) Töflur, belgir og mixtúrur
2) Grænmeti
3) Sælgætisleysi

Ómar Þorsteinn:
1) Norskir drykkjaflöskutappar
2) Heit eggjalykt úr Sindra
3) Kóngulær

"Versti horbjóður, kindabyssuna á þessi kvikindi, ógn alheimsins". (Silla)

Páskamyndirnar komnar inn

2006-04-16T22:49:00.000+02:00

Við vorum að setja nýjar myndir inn.
Hér er m.a. að finna myndir úr áðurnefndum göngutúr í Troldhaugen. Í gær fórum við síðan í dásamlega útsýnisferð upp í Fløien. Þar gat maður séð yfir Bergen úr 320 metra hæð og var fegurðin engu lík. Klárlega staður sem við komum með til að fara með ykkur á þegar þið komið í heimsókn. Svo er Ulriksbanen líka eitthvað sem verður á þeim lista.
Þúsund kossar frá okkur og hlýlegar kveðjur upp á Skaga.

Íslenskir páskar

2006-04-14T23:32:00.000+02:00

Jæja, þá er allt orðið gott á ný. Amma Dísa er nefnilega komin. Nú getur Ásdís Eva hætt að telja niður en hún hefur talið niður dagana þangað til Amma Dísa kæmi, alveg frá því í febrúar. Ég tel mig eigi vera að fara með fleipur þegar ég segi að hún hafi talað um Ömmu Dísu nánast stanslaust frá því um miðjan mars.

Já Amma Dísa og Maja frænka komu til Fana aðfaranótt þriðjudagsins. Það verða íslenskir páskar hér því það sem verður m.a. á boðstólnum hér á okkar heimili næstu daga er íslenskt lambalæri, íslenskur hamborgarahryggur, íslensk páskaegg og íslenskur harðfiskur.

Í dag fórum við í göngutúr um Troldhaugen, heimili Edward Grieg hins fræga tónskálds. Þrátt fyrir rigningu undanfarna daga þá viðraði vel á okkur í dag og sólin léta sjá sig annað slagið. Fallegar gönguleiðir og stórbrotið útsýni yfir fjörðinn.

Síðan fórum við í bíltúr út í Os og á Hagavik. Frábær dagur endaði síðan með íslensku lambalæri sem sveik engan frekar en fyrri daginn.

Pirrandi smámunir

2006-04-10T22:00:00.000+02:00

Ég er almennt glaður maður. Ég er almennt bjartsýnn maður.
Ég er almennt jákvæður maður. Ég er almennilegur maður.
Hins vegar er eitt sem fer gríðarlega í mína fínustu úttaugunga.
Allir kannast við innsiglið sem er hálffast við tappann á drykkjarflöskunum. Það er að ég held til þess gert að tappinn skrúfist ekki "óvart" af og svo fer það yfirleitt ekki á milli mála ef einhver hefur opnað flöskuna. Oftast verður innsiglið eftir á stútnum þegar maður skrúfar tappann af án nokkurra vandræða, málið dautt!!!
En hér í Noregi er þetta ekki alveg svona einfalt. Nei aldeilis ekki. Ég fer alveg að verða bandbrjálaðslega reiður og pirraður innsiglunum hér. Því er nefnilega þannig háttað að þetta innsigli er u.þ.b. þrefalt þykkra en við erum vön á Íslandi. Svo er alveg gjörsamlega einstaklega vonlaust verk að fá tappan lausan frá því. Það er nefnilega áfast tappanum á c.a. 1 cm svæði. Stundum nær maður að klippa þetta í sundur til að fá tappann lausan en þá þarf maður helst að nota vírklippur eða járnsög því venjuleg skæri bíta sko ekki á þetta. Því er það þannig að tappinn situr venjulega fastur á innsiglinu og því vonlaust verk að drekka úr flöskunni með tappann hangandi á stútnum. Og ef maður ætlar að hella þá þvælist tappinn oftast fyrir og gosið endar allt annars staðar en í glasinu.
Já þetta hljómar fáranlega en þetta er hreinn sannleikur. Þvílíkir smámunir sem þetta ættu að vera í mínu annars ágæta lífi hafa á hinn bóginn orðið stórt vandamál, stærra en orð fá lýst, stærra en nokkur lifandi maður myndi nokkurn tíma trúa, stærra en sólin.